हिमनदी बचत तथा ऋण सहकारी संस्थाले १५ औं साधारण सभा सम्पन्न गरेको छ । संस्थाका अध्यक्ष सागरमान ब्यञ्जनकारको अध्यक्षतामा भएको साधारण सभाको प्रमुख अथिति प्रेम बहादुर महर्जन रहेका थिए । ज्यापु प्रज्ञा भवनमा गरिएको साधारण सभामा अध्यक्ष ब्यञ्जनकारले प्रतिवेदन प्रस्तुत गर्र्दै विगत केही बर्षदेखि केही सहकारी संस्थाका स्वार्थी प्रवितिका सञ्चालक र राज्यको प्रभावकारी  नियमनको अभावले केही संस्थाहरु धरासयी हुँदा जनमानसमा नकरात्मक धारणा विकास भएको बताए ।

यसले गर्दा समुदायमा आधारित सहकारीले गुणात्मक फड्को मार्न नसको उनको भनाई छ । सहकारी ऐनमा व्यवस्था भएको कर्जा सूचना केन्द्र ऋण असुली न्यायधिकरण र बचत तथा कर्जा सुरक्षण कोष समयमा सञ्चालनमा ल्याउन नसक्दा  सहकारी सञ्चालनमा समस्या भएको उनको भनाई छ । संस्थाले भने सरकारको नीति र संस्थाको विनियमको अधिनमा रहेर सदस्यहरुको आर्थिक तथा सामाजिक रुपान्तरणमा काम गर्दै आएको उनले सभामा जनाए । संस्थाबाट कर्जा लिएर समयमा साँवा ब्याज नबुझाउने सदस्यहरुलाई हदैसम्म लचकता अपनाइएको र त्यसको बावजुत पनि अटेर गर्ने ऋणी सदस्यहरुलाई कानुनी प्रक्रिया मार्फत ऋण असुली गर्ने उनले प्रष्ट पारे । संस्थाका सचिव रबिना ब्यञ्जनकारले आर्थिक बर्ष २०८०/८१ को  प्रगति प्रतिवेदन र यस आर्थिक बर्षका लागि नीति तथा कार्यक्रम सभामा प्रस्तुत गरेकी थिइन्  ।

संस्थाका कोषाध्यक्ष बिजेन्द्र मर्हजनले आर्थिक प्रतिवेदन प्रस्तुत गर्दै  आर्थिक बर्ष २०८०/८१  मा शेयर पुँजी  १ करोड ९२ लाख, जगेडा कोष १ करोड ५९ लाख,ऋण नोक्सानी कोष ४४ लाख ७१ हजार, बचत संकलन १० करोड ५६ लाख र ऋण लगानी ११ करोड ९ लाख ५६ हजार पुगेको  जानकारी दिए । संस्थाले त्यस अवधिमा ७३ लाख ९६ हजार नाफा गर्न सफल भएको छ । संस्थाले गत बर्षको नाफाबाट सदस्यहरुलाई ११ प्रतिशत लाभांश र संरक्षित पुँजी फिर्ता कोषबाट  बचत र ऋणको कारोबारको आधारमा रकम फिर्ता दिने भएको छ ।

संस्थाले  सदस्यहरुको वित्तीय कारोबारलाई सहज बनाउन एटिएम कार्ड,कनेक्ट आइपिएस, ई सेवा,खल्ती जस्ता सेवाहरु सञ्चालनमा ल्याएको छ । संस्थाले व्यापार व्यसाय,घर जग्गा,आकस्मिक,आवधिक,शैक्षिक,उद्यमी,शेयर धितो जस्ता क्षेत्रमा ऋण लगानी गर्दै आएको छ । सभामा विभिन्न विद्यामा सदस्यहरुलाई सम्मान तथा पुरस्कार प्रदान गरिएको थियो । संस्था नेफ्स्कूनले सञ्चालन गरेको प्रोवेशन कार्यक्रम आवद्ध भएको छ ।