रुपन्देहीको जनउत्थान बचत तथा ऋण सहकारी संस्थामा गिरीप्रसाद पुनको अध्यक्षतामा संचालक समिति चयन भएको छ । संस्थाको १९औं वार्षिक साधारण सभाले १३ सदस्यीय सञ्चालक समिति चयन गरेको हो । सभाले सञ्चालक समितिको उपाध्यक्षमा सरु राना, सचिवमा अन्जु जैसी, कोषाध्यक्षमा निल प्रसाद पुनलाई चयन गरेको छ ।

त्यसैगरी संस्थाको सञ्चालक सदस्यहरुमा गंगा अधिकारी, विष्णुमाया कुवर, सीता बस्याल, खिमबहादुर राना, सफिउर्रहमान अन्सारी, भैरबहादुर थापा, जोग बहादुर सुर्यवंशी, पुरन बहादुर शाही र लिला कुमारी थापालाई चयन गरेको हो । त्यसैगरी  सभाले खुमाकान्त अधिकारीको संयोजकत्वमा तीन सदस्यीय लेखा सुपरीवेक्षण समिति चयन गरेको छ ।  समितिको सदस्यहरुमा रामबहादुर सोमरे र रुपा भण्डारी निर्वाचित भएका छन । 

 कार्यक्रममा संस्थाले सबै शेयर सदस्यहरुबाट १० र १० रुपैया उठाएर प्रधानमन्त्री राहत कोषमा ४ लाख बुझाएको छ । त्यस्तै सभाले तिलोत्तमा सिटि न्यूजका सम्पादक मोहन न्यौपानेलाई यस वर्षको जनउत्थान सहकारी पत्रकारिता पुरस्कार २०८१ बाट सम्मान गरिएको छ । कार्यक्रममा फिल्ड सहायकको तर्फबाट अन्जु कुमारी चौधरी, कार्यालय सहायकको तर्फबाट सीता रजाली, सेवा केन्द्र प्रमुखको तर्फबाट जोग बहादुर थापालाई उत्कृष्ट कर्मचारीको रुपमा सम्मान गरेको थियो ।

कार्यक्रम संस्थाको का .व .अध्यक्ष गिरीप्रसाद पुनको अध्यक्षता र रुपन्देहि जिल्ला प्रमुख जिल्ला अधिकारी गणेश अर्याल, विशिष्ठ अतिथी नेफ्स्कून सञ्चालक ज्ञानु पौडयालले शुभकामना मन्तव्य राखेका थिए । सभाले गत आर्थिक वर्ष २०८० /८१ को ११.१८ करोड (शुद्ध मुनाफा) सहितको आय व्यय विवरण र आगामी आर्थिक वर्ष २०८१ / ८२ मा करिब १२ करोड शुद्ध मुनाफा र ४३५ करोड कुल वासलात पुर्याउने लक्ष्य सहितको अनुमानित आय व्यय  सर्बसम्मत पारित गरेको छ । संस्थामा हाल ८७ जना कर्मचारीहरु कार्यरत छन । ३१ जनाले सय सय रुपैया उठाएर बाग्लुङ सामुदायिक संस्थाबाट शुरु भई २०६२ पौष १ गते जनउत्थान बचत तथा ऋण सहकारी संस्थाको रुपमा दर्ता भएको हो । हाल जनउत्थान साकोस, पहुँच महिला साकोस, गौमुखि साकोस, बुद्ध बहुउद्देश्यीय सहकारी, पटाकसार बचत तथा ऋण सहकारी संस्था, सुदृढ साकोस र सगोल महिला साकोस गरी हालसम्म ७ वटा सहकारीहरु एकिकरण भइसकेका छन् ।