भक्तपुरमा दुई दिवसिय आन्तरिक लेखापरिक्षण तालिम सम्पन्न भएको छ । भक्तपुर जिल्ला बचत तथा ऋण सहकारी संघ लि.को संस्थागत विकास उपसमितिको आयोजनामा तालिम सञ्चालन भएको हो ।
तालिम कार्यक्रममा संघका सचिव जगनाथ प्रजापतिले सहकारीमा समस्या आन्तरिक र बाह्य कारणहरुले देखापरेको धारण राखे । संस्थाहरुमा लेखा सुपरिवेक्षण समिति आफ्नो भुमिकाबाट बिमुख हुँदा समयमै सहकारीको आन्तरिक समस्या समाधान हुन नसकेका कारणसहकारीमा समस्या बल्झेको बताए ।
सहकारी क्षेत्र विषम परिस्थितिमा रहेको बेला लेखा सुपरिवेक्षण समितिहरुलाई सबल र सक्षम बनाउन आवश्यक रहेको देखिएकोले संघले आन्तरिक लेखापरिक्षण तालिमको आयोजना गरेको उनले बताए । सहकारी संस्थाहरुले सहकारी ऐन, कानुन, विधि र सुशासनमा संचालन गरेमा समस्या नआउने ठहर गर्दै उनले लेखासुपरिवेक्षण समितिले आफ्नो महत्वपुर्ण भुमिका निर्वाह गरी समयमै संचालक, व्यवस्थापन र सदस्यलाई सचेत गराउनुपर्ने जनाए ।
संघका व्यवस्थापक बालकृष्ण धोजुले सहकारीमा देखिएको हालको समस्या सहकारीका संचालक, लेखा सुपरिवेक्षण समिति, व्यवस्थापन र सदस्यलाई सहकारी शिक्षाको अभावबाट सिर्जित भएको बताए । सहकारीका समिति, उपसमिति, व्यवस्थापन र सदस्यलाई निरन्तर सहकारी शिक्षा तथा तालिम प्रदान गरी आ—आफ्नो भुमिका निभाउन प्रोत्साहन गर्नुपर्ने उनले जनाए ।
बागमती प्रोस्कूनका कार्यक्रम अधिकृत नवराज घोरासाइनेले तालिम कार्यक्रमको सहजिकरण गर्दै सहकारीमा लेखासुपरिवेक्षण समितिको भुमिका धेरै हुने भएकोले निरन्तर तालिम लिई अद्यावधिक हुनुपर्ने विचार राखे । वहाँले आन्तरिक लेखापरिक्षणका परिचय, अवधारण, ज्ञान, सीप, क्षेत्र, चरण, प्रतिवेदन, कानुनी व्यवस्था आदि लगायतका विषयमा सहजिकरण गरेका थिए ।
तालिममा सहभागीहरुले धेरै कुराहरु सिक्न पाएँकोमा खुशी व्यक्त गर्दै तालिमबाट लेखा सुपरिवेक्षण समितिका भुमिका बोध भएको र यस्ता तालिमहरु निरन्तर संघले आयोजना गर्ने आशा राखे । तालिममा संघ आबद्ध सदस्य संस्थाहरु मध्येबाट २८ जना लेखा सुपरिवेक्षण समितिका संयोजक तथा सदस्यहरुको सहभागिता रहेको थियो ।
