ललितपुर  जिल्ला वचत तथा ऋण सहकारी संघको आयोजनामा साकोसका अध्यक्षहरुको क्षमता अभिवृद्धि गोष्ठी  हुने भएको छ । संघको आयोजनामा  “साकोसमा अध्यक्षको भूमिका र जवाफदेहिता” भन्ने नारालाई आत्मसाथ गर्दै आर्थिक सम्वृद्धिमा सुन्दर भविष्य र सम्भावना वोकेको सहकारी संस्थाको बृहत्तर विकासका लागि “साकोस अध्यक्ष गोष्ठी २०८० ललितपुर” हुन लागेको हो । संघले आगामी फागुन ४ र ५ गते  नगरकोटको रत्नागिरी रिर्सोटमा  गोष्ठी गर्ने जनाएको छ । विभिन्न विषयहरुमा विज्ञहरुको  प्रस्तुति र सहभागीहरुको  सुझावहरुलाई  समेटेर सघन मन्थन गरी निकास र निष्कर्ष निकाल्ने मञ्चको रुपमा साकोस अध्यक्ष  गोष्ठी हुने संघले जनाएको छ

। वर्तमान परिस्थितिको  सामाना  गर्न  अध्यक्षहरुको क्षमता विकास गर्ने उदेश्यले गोष्ठीको आयोजना हुन लागेको हो । गोष्ठीमा  पूर्व अर्थ सचिव रामेश्वर खनालले नेपालको अर्थतन्त्रमा सहकारी क्षेत्रको उपस्थितिःराष्ट्रिय पुँजी निमार्ण र ग्राहस्थ उत्पादनमा योगदान, प्रेरक वक्ता एवं पूर्व राजदुत महेश दाहालले सकरात्मक सोच सहितको सहकारी नेतृत्व र व्यक्तित्व विकास, राष्ट्रिय सहकारी बैंकका सिइओ बद्री कुमार गुरागाईले वित्तीय सहकारीको जोखिम व्यवस्थापनःजोखिम पहिचान, विश्लेषण, मुल्याङ्कन पद्धती र ललितपुरका सहायक प्रमुख जिल्ला अधिकारी अमर दिप सुनुवारले सहकारीको समस्या समाधानमा प्रसासनको भूमिका विषयमा प्रस्तुति गर्ने संघले जनाएको छ ।

त्यसैगरी सिआइवीको तर्फबाट सहकारी क्षेत्रमा कानुन पालनाको विद्यमान अवस्थाः कानुनको पालनामा नेतृत्वको जवाफदेहिता ,चन्द्रागिरी साकोसका सिइओ कृष्ण कुमार श्रेष्ठले सफल सहकारी निमार्ण कसरी ?संकट व्यवस्थापन नेतृत्वको जिम्मेवारी , भूमिका र जवाफदेहिता तथा हास्य कलाकार राजा राजेन्द्र पोखरेलले आफ्नो प्रस्तुति राख्ने भएका छन् ।