संघीय सहकारी विभागले देशभरका सबै सहकारी संघसंस्थाहरुलाई आफ्ना सदस्यको केवाईएम फाराम भर्न निर्देशन दिएको छ । विभागले हिजो एक सूचना जारी गर्दै देशभर रहेका ३० हजार सहकारी संघसंस्थाहरुलाई केवाइएम फारम भर्न भनेको हो । विभागले फारमको ढाँचा समेत बनाएर ३८ वटा बुँदामा संस्थाका सदस्यको अभिलेख भरी अद्यावधिक राख्न भनेको छ । 

सहकारी संघसंस्थाहरुको अनुगमन तथा निरीक्षणको क्रममा सबै सदस्यहरुको केवाईएम फारम भरेनभरेको समेत अनुगमन गरिने हुँदा सबै सदस्यहरुको केवाईएम फारम भरी स्पष्ट र व्यवस्थित रुपमा संस्थामा राख्न विभागले निर्देशन दिएको छ । 

सम्पत्ति शुद्धिकरण निवारण ऐन २०६४ को दफा ७ क सम्पत्ति शुद्धिकरण निवारण नियमावली २०७३ को नियम ४ र ५ तथा सहकारी विभागबाट सम्पत्ति शुद्धिकरण निवारण सम्बन्धी सहकारी संघसंस्थाहरुलाई जारी गरिएको तेश्रो संशोधन निर्देशन २०७४ को दफा ३ अनुसार प्रत्येक सहकारीमा सदस्य हुन ईच्छुक व्यक्तिको पहिचान तथा सम्पुष्टी गरेर मात्र सदस्य बनाउनुपर्ने व्यवस्था रहेको उल्लेख छ । विवरणमा व्यक्तिगत पारिवारिक, व्यवसाय, बसाई, सहकारीमा सदस्यता, आयश्रोत, वित्तीय कारोबारको जानकारी गराउनुपर्ने उल्लेख छ ।