नेपाल बचत तथा ऋण केन्द्रिय सहकारी संघ (नेफ्स्कुन)को साधारणसभा नजिकिएसँगै चुनावी सरगर्मी बढेर गएको छ । आगामी पौष ७ र ८ गते हुने अधिवेशनसहितको ३२औं साधारणसभा नजिकिएसँगै एक पछि अर्को आकांक्षीहरुले उमेदवारी घोषणा गर्न थालेका छन् ।
नेफ्स्कुनको चुनावी कार्यतालिका अनुसार पौष ७ गते उमेदवारहरुको दरखास्त लिने तथा अन्तिम नामावली प्रकाशत गर्ने समय तोकिएको भएपनि आकांक्षीहरुले आआफ्नो उमेदवारी घोषणा गर्न शुरु गरेका हुन् । हाल नेफ्स्कुनमा अध्यक्ष रहेका परितोष पौड्याल र बरिष्ठ उपाध्यक्ष चन्द्रप्रसाद ढकाल दुवैले अध्यक्ष पदका लागि आफ्नो दावी प्रस्तुत गरेका छन् ।
हालका अध्यक्ष पौड्यालले एक कार्यक्रममार्फत नेफ्स्कुनमा दोश्रो कार्यकालका अध्यक्ष पदमा उमेदवारी दिने घोषणा गरेका हुन् ।पौडेलले आफ्नाे कार्यकालमा थालनी गरेका केही अधुरा र बाँकी रहेका काम सम्पन्न गर्न थप एक कार्यकाल नेतृत्वमा दोहोराउने जनाएका छन् । पहिलाे कार्यकालकाे शुरूवातसँग विश्वव्यापी काेभिड १९ काे प्रकाेप तथा आर्थिक मन्दीका कारण आफुले बनाएका याेजना पूरा गर्न बाँकी रहेकाे भन्दै उनले ती काम पूरा गर्नका लागि उमेदवारी घाेषणा गरेकाे बताए । सहमति, सहकार्य र सहअस्तित्वबाट नेतृत्व चयन गर्ने उनकाे भनाइ छ । त्यसैका लागि बाँकी पदहरूमा उमेदवारी सार्वजनिक नगरिएकाे र सहमतिबाट नै अगाडि बढ्ने उनले बताए ।
यता बरिष्ठ उपाध्यक्ष ढकालले भने आफु नेफ्स्कुनकाे बरिष्ठ उपाध्यक्ष भएकाले स्वत: अध्यक्ष पदको दावेदार रहेको बताउँदै आएका छन् । विगत अढाई दशकदेखि साकोस अभियानमा योगदान दिँदै आएको भन्दै ढकालले साकोस अभियानको छविलाई थप उचाईमा लैजान आफ्नो उमेदवारी रहेको जनाएका छन् । खस्किएकाे साकाेस अभियानलाइ माथि उठाउने, ऐन नियम कार्यान्वयनमा स्थानीय, प्रदेश र संघीय सरकारसँग बहसपैरवी गर्ने एवं बचतऋणकाे छुट्टै ऐन जारी गर्न पहल गर्ने मुख्य एजेण्डा रहेकाे उनले बताउँदै आएका छन् ।
त्यसैगरी नेफ्स्कुनको उपाध्यक्ष, महासचिव एवं सञ्चालक पदका लागि पनि सहकारीकर्मीहरुले विभिन्न सञ्चारमाध्यम एवं सामाजिक सञ्जालमार्फत उमेदवारी घोषणा गर्ने क्रम जारी राखेका छन् । बचतऋण अभियानकाे एक मात्र छाता संघ नेफ्स्कुन रहेकाले देशभरबाट नेतृत्वका आकांक्षीहरू देखिएका छन् । नेफ्स्कुनमा ४ हजार ५ सयकाे हाराहारीमा प्रारम्भिक संस्था आवद्ध रहेकाे भएतापनि २ हजार ६०० संस्थाले साधारणसभाका लागि प्रतिनिधि छनाैट गरी पठाएका छन् ।
