बागमती प्रदेश संस्कृति ,पर्यटन तथा सहकारी मन्त्री पुकार मर्हजनले संकटग्रस्त सहकारी व्यवस्थापन समिति गठनको प्रक्रिया अगाडी बढाएको बताएका छन् । बागमती प्रदेश सरकारको वित्तीय सहयोग र बागमती प्रदेश सहकारी संघको आयोजनामा आजबाट ललितपुरमा सुरु भएको सहकारी नेतृत्व विकास तालिमको उद्घाटन गर्दै उनले सो कुरा बताएका हुन् ।

कतिपय सहकारी संस्थाले सदस्यको बचत अपचलन गरेर सञ्चालकहरु सम्पर्कविहिन भएको र केही सञ्चालकहरु विदेश समेत पलायन भएको भन्दै उनले गलत गर्ने सहकारीलाई कारवाही गर्न मन्त्रालयले उक्त समिति गठनको प्रक्रिया अगाडी बढाएको बताए । सो अवसरमा उनले प्रदेश सहकारी ऐन संशाेधनको  प्रक्रिया अगाडी बढाएको र सहभागीहरुले पनि ऐन संशाेधनका लागि आफ्नो सुझाव दिन आग्रह गरे । गलत गर्ने सहकारी संस्थालाई कारवाही नगरेसम्म सहकारीको समस्या समाधान नहुने र यसले सहकारीप्रति सकरात्मक वातावरण सृजना नगर्ने भएकाले सदस्यको बचत दुरुपयोग गर्ने सहकारी संस्थालाई कानुनी दायरामा ल्याइने  समेत उनले प्रष्ट पारे ।

गलत कार्यलाई निरुसाहित पार्न नसके सबै सहकारीप्रति सदस्यको विश्वास टुट्ने उनको भनाई छ । गलत गर्ने संस्थालाई सरकारले कारवाही गर्ने रहेछ भन्ने सन्देश दिएर सहकारीप्रति गुमेको विश्वास स्थापित गर्न आफुहहरु लागि परेको उनको भनाई छ। ‘अहिले सदस्यहरुमा सबै सहकारी नराम्रा छन् र मेरो बचत फिर्ता हुँदैन कि भन्न डर  छ’ उनले भने ,‘गलत गर्ने सहकारीलाई कारवाही गरेर राम्रा सहकारीप्रति विश्वासको वातावरण बनाउनुपर्छ । त्यस्ता संस्थालाई कानुनी दायरामा ल्याउने नसके सदस्यमा सरकार रहेको अनुभव हुँदैन र यसले सिंगो अभियानलाई नै धक्का पुग्छ ।’

विश्वव्यापी रुपमा आएको आर्थिक मन्दीले सहकारी क्षेत्रलाई अप्ठ्यारोमा पारेको भए पनि केही सहकारीका कारण सदस्य र सहकारीबीच अविश्वासको खाडल बढेको र यी दुईबीचको अविश्वासलाई कम गर्न सके सहकारीलाई पहिलाकै अवस्थामा फर्काउन सकिने उनको भनाई छ । अर्थतन्त्रमा सामान्य सुधार देखिन थालेकाले मुलकमा वित्तीय संकटको अन्त्य भई सहकारी अभियानमा पनि सुधार हुने उनको विश्वास छ । चार दिनको तालिमबाट   सिप र क्षमता  विकास गरी अभियानलाई थप उचाइमा लैजान सहभागीहरुलाई उनको आग्रह छ ।  कार्यक्रम संघका अध्यक्ष रामशरण शर्मा घिमिरेको सभापतित्वमा भएको थियो ।