भक्तपुरको भुलाँचामा रहेको संचित बचत तथा ऋण सहकारी संस्थाले १४ औ बार्षिक साधारण सभा सम्पन्न गरेको छ । संस्थाका अध्यक्ष  योगेन्द्र बहादुर खर्बुजाको अध्यक्षतामा भएको कार्यक्रमको प्रमुख अतिथि भक्तपुर जिल्ला बचत तथ ऋण सहकारी संघका अध्यक्ष कृष्णगोविन्द लाखाजु र विशिष्ट अतिथिमा इतिहासविद् प्रा.डा. पुरुषोतमलोचन श्रेष्ठ रहेका थिए ।

सभाका प्रमुख अतिथि लाखाजुले सहकारीमा सदस्यले जम्मा गरेको बचत सञ्चालकहरुले आफु खुशी सञ्चालन गर्न नपाईने भएता पनि कतिपय सहकारीका सञ्चालकले सदस्यको बचत आफुखुशी सञ्चालन गर्दा अहिले समस्या आएको बताए ।  न्युन आय भएकाहरुका लागि सहकारी आवश्यक भएको भए पनि सहकारी आवश्यक नभएका व्यक्तिहरु यस क्षेत्रमा  प्रवेश गर्दा समस्या आएको उनले बताए ।  कुल बचतमा नियमित बचतको हिंसा १० प्रतिशत माथी रहेका संस्था राम्रो हुने उनले जनाए । 

सहकारीको बचत  सदस्यलाई जानकारी नै नदिई घर जग्गा जस्ता क्षेत्रमा लगानी गरेकाले  कतिपय संस्था अहिले   समस्या आएको उनको भनाई छ । सहकारी संस्थाका केही सञ्चालकहरुले गरेको वदमासीले सहकारीप्रति समाजमा नकरात्मक प्रभाव परेको उनले बताए । सहकारी सदस्यका लागि हुनु पर्ने हो तर केही सहकारीका सञ्चालकले संस्थाको रकम दुरुपयोग गरेकाले ती  संस्थाहरु मात्र समस्यामा रहेको उनले बताए । सभामा संस्थाका अध्यक्ष खर्बुजाले मन्तव्य राख्दै  गैर समुदायमा आधारित मुल्य, मान्यता  र सिद्धान्त बाहिर गएर सञ्चालन भएका  सहकारी संस्थाहरुमा मात्र समस्या आएको बताए ।भक्तपुर नगर भित्र अन्य क्षेत्रमा जस्तो समस्याग्रस्त सहकारी कम रहेको र समुदायमा आधारित भई सदस्य केन्द्रीत वित्तीय कारोवार गर्ने संस्थामा मात्र सदस्य बनेर कारोवार गर्न  उनले जोड दिए । समुदायमा आधारित भएर नीति, विधि र प्रविधिलाई आत्मसात गरी विभिन्न सामाजिक कार्य गर्दै अगाडी बढेका सहकारीमा समस्या नआउने उनको भनाई छ ।

संस्थाले सदस्यहरुलाई लक्षित गर्दै विगतका बर्षहरुमा जस्तै यस बर्ष पनि रक्तदान, स्वास्थ्य शिविर तथा निः शुल्क औषधी वितरण जस्ता गतिविधि सञ्चालन गर्ने उनले सभामा जानकारी दिए । संस्थाका सचिव न्युटनप्रसाद सुवालले आर्थिक बर्ष २०७९÷८० बार्षिक प्रतिवेदन सभामा प्रस्तुत गरेका थिए । संस्थाले यस आ.ब.मा नेतृत्व विकास तालिम,समिति तथा उपसमितिहरुको क्षमता अभिवृद्धि तालिम, बाल सदस्य प्रोत्साहन कार्यक्रम ,स्वास्थ्य शिविर , सिपमुलक तालिम र सहकारी अवलोकन भ्रमण जस्ता कार्यक्रम गरिने उनले  सभामा जानकारी दिए । संस्थाकी कोषाध्यक्ष सरस्वती हाकुदुवालले आर्थिक बर्ष २०७९÷८० को  आर्थिक प्रतिवेदन प्रस्तुत गर्दै मुलुकमा आएको आर्थिक मन्दीले व्यापार व्यसाय तथा आर्थिक क्रियाकलापमा कमी आउँदा त्यसको प्रभाव सहकारीमा पनि परेको बताईन् । संस्थाको गत असार मसान्तसम्म कुल सम्पत्ति ६२ करोड ५१ लाख पुगेको उनले सभामा जानकारी दिईन् ।

 त्यसैगरी संस्थाको शेयर पुँजी २ करोड ९५ लाख ,  जगेडा कोष १ करोड ५२ लाख, अन्य कोषहरु ३ करोड , बचत संकलन ४२ करोड ९० लाख १६ हजार  र ऋण लगानी ४८ करोड ६० लाख रहेको छ । संस्थामा ३ हजार २०३ जना सदस्य आवद्ध रहेका छन् । संस्थाका लेखा सुपरिवेक्षण समितिका संयोजक पुजन कर्माचार्यले समितिको प्रतिवेदन प्रस्तुत गर्दै संस्थालाई सुदृढ बनाउन नियमित बचत गर्न विशेष पहल गर्न , निस्कृय सदस्यहरुको पहिचान गरी सक्रिय बनाउन र सदस्यहरुलाई बढी भन्दा बढी मोबाईल एप्पको प्रयोग  गरी अनलाइन पेमेन्ट सिष्टम प्रयोगमा ल्याउन प्रोत्साहन दिन सुझाव दिए ।