नयाँपाटी बचत तथा ऋण सहकारी संस्थाको साधारण सभा सम्पन्न भएको छ । संस्थाले सदस्यको सहजताको लागि क्षेत्रगत रुपमा साधारण सभा गरी २६औं साधारण सम्पन्न गरेको हो ।

संस्थाको ईकाई सभाबाट चुनिएका प्रतिनिधिहरुको निर्णय प्रमाणिकरण सभामा अध्यक्ष गौतम खनालले ‘सम्पूर्ण वित्तीय समाधानको पहिलो छनाैट नयाँ पाटी साकोस’  भन्ने परिकल्पनाका साथ काम गरिरहेको बताए । संस्थाले सोही अनुरुप सदस्यको सम्पूर्ण वित्तीय आवश्यकता पुरा गर्ने गरी काम गर्दै आएको पनि उनले सभामा जानकारी गराए । आर्थिक मन्दी र कोभिड-१९ का कारण सदस्यहरुको व्यापार व्यवसायको प्रभावलाई आँकलन गर्दै संस्थाले व्याजमा ५ प्रतिशत व्याज छुट दिएर ऋण असुलीका लागि प्रयास गर्दै आएको उनले सभामा जनाए ।

सदस्यहरुलाई छिटो, छरितो र प्रभावकारी वित्तीय सेवा दिन संस्थाले आधुनिक प्रविधि प्रयोग गर्दै आएको र सदस्यहरुलाई सहकारीको महत्वको बारेमा बुझाउन सहकारी शिक्षा कार्यक्रम समेत सञ्चालन गर्दै आएको उनको भनाई छ । संस्थाका सचिव चिरञ्जिवी सिंखडाले आर्थिक बर्ष २०७९।८० को प्रगति प्रतिवेदन सभामा प्रस्तुत गर्दै सदस्यहरुलाई गुणस्तरीय र प्रभावकारी वित्तीय सेवाको माध्यमबाट काठकाडौं जिल्लाको एक उत्कृष्ट संस्था बनाउने लक्ष्य लिएको बताए । संस्थाका कोषाध्यक्ष बसन्त कुमार पण्डितले आर्थिक बर्ष २०७९।८० को आर्थिक प्रतिवेदन सभामा प्रस्तुत गर्दै बजारमा आएको तरलता संकट लगायतका समस्याको बावजुद पनि संस्थाले वित्तीय कारोबारमा वृद्धि गर्न सकेको बताए ।

संस्थाले गत असार मसान्तसम्म १ अर्ब १८ करोड ७२ लाख कुल सम्पत्ति पुर्याउन सफल भएको छ। त्यसैगरी १२ करोड ८६ लाख ७४ हजार शेयर पुँजी, ८२ करोड ८८ लाख १७ हजार बचत संकलन र ८३  करोड  ५२ लाख ४५ हजार ऋण लगानी गरेको छ । संस्थाले गत आर्थिक बर्षमा  ४ करोड २६ लाख मुनाफा आर्जन गरेको छ। संस्थाकाे पुँजीकाेषमा १० कराेड ७७ लाख पुगेकाे छ। २०५४ सालमा २८ जना युवा र २८ सय रूपैया शेयरपुँजीबाट सुरु भएको संस्थामा हाल ९ हजार ९२५ जना सदस्य पुगेका छन् ।

संस्थाले जोरपाटी सेवा केन्द्रको आफनै जग्गा रहेकाले यस बर्षमा  भवन बनाउने र त्यसका लागि १ करोड बजेट विनियोजन गरेको सभामा जानकारी दिईयो । संस्थाले गोकर्णेश्वर र कागेश्वरी मनोहरा नगरपालिका भित्र बसोवास गर्ने व्यक्तिहरुलाई सदस्य बनाउन नयाँ रणनीति अबलम्बन गर्ने, १८ वर्ष मुनिका युवाहरु सदस्य बन्दा प्रवेश शुल्क नलिने र उदेश्य मिल्ने संस्थाहरुसँग एकीकरण गर्ने कार्यलाई निरन्तरता दिने सभामा जानकारी दिइयो । संस्थाले महिला सदस्यहरुको जीवनस्तर परिर्वतनका लागि लघुवित कार्यक्रम समेत सञ्चालनमा ल्याएको छ । उक्त कार्यक्रमबाट सयौं महिला सदस्यहरुको जीवनस्तर परिर्वतन गर्न सफल भएको जनाएकाे छ।