चीनले घरेलु अर्थतन्त्रमा देखिएको मन्दी, बढ्दो भूराजनीतिक तनाव र अन्तर्राष्ट्रिय अनिश्चितताबीच सन् २०२६ का लागि आर्थिक वृद्धिको लक्ष्य ४.५ देखि पाँच प्रतिशतसम्ममा सीमित राख्ने घोषणा गरेको छ। यसले चीनले तीव्र आर्थिक प्रोत्साहनभन्दा स्थिरता र दीर्घकालीन नीतिगत निरन्तरतामै जोड दिन खोजेको संकेत दिएको विश्लेषकहरूले बताएका छन्।

चीनका प्रधानमन्त्री सियाङ्गले राष्ट्रिय जनकङ्ग्रेसको वार्षिक बैठकमा प्रस्तुत सरकारी प्रतिवेदनमार्फत उक्त लक्ष्य सार्वजनिक गरेका हुन्। नयाँ लक्ष्य गत वर्षको करिब पाँच प्रतिशत वास्तविक आर्थिक वृद्धिदरभन्दा केही कम हो। विश्लेषकका अनुसार सन् १९९० दशकयताकै न्यून वृद्धि लक्ष्यमध्ये यो एक मानिन्छ।

सरकारले घरेलु माग बढाएर सुस्त अर्थतन्त्रलाई पुनर्जीवित गर्ने र उन्नत प्रविधि क्षेत्रमा विश्व नेतृत्व कायम गर्ने रणनीतिलाई सन्तुलनमा राख्ने प्रयास गरिरहेको जनाएको छ। राष्ट्रपति सि जिनपिङको प्राथमिकताअनुसार कृत्रिम बौद्धिकता, रोबोटिक्स र उच्च प्रविधि उद्योगलाई अर्थतन्त्रको नयाँ चालकका रूपमा अघि बढाइने नीति कायम रहने बताइएको छ।

प्रतिवेदनमा छोटो अवधिमा अर्थतन्त्रलाई तीव्र गति दिने ठूलो प्रोत्साहन कार्यक्रम ल्याइने सम्भावना कम रहेको संकेत पनि दिइएको छ। यद्यपि उपभोक्ता खर्च बढाउन सरकारले पुराना सवारीसाधन तथा उपकरण साटेर नयाँ किन्ने कार्यक्रमका लागि ठूलो वित्तीय प्रोत्साहन दिने योजना अघि सारेको छ।

चीनले रक्षा खर्चको वृद्धिदरलाई पनि करिब सात प्रतिशतमा सीमित राख्ने प्रस्ताव गरेको छ। यसलाई आर्थिक दबाबबीच सैन्य आधुनिकीकरणलाई निरन्तरता दिने सन्तुलित रणनीतिका रूपमा विश्लेषकहरूले व्याख्या गरेका छन्।

विश्लेषकका अनुसार अमेरिकासँगको व्यापार तनाव, ऊर्जा आपूर्ति जोखिम र कमजोर घरेलु मागका कारण चीनको अर्थतन्त्र अहिले जटिल चरणमा पुगेको छ। तर निर्यातको बलियो प्रदर्शन र प्रविधि क्षेत्रमा बढ्दो लगानीले आगामी वर्षहरूमा चीनको आर्थिक गतिलाई स्थिर राख्ने अपेक्षा गरिएको छ।