सहकारी संघ संस्थाको ऋण असुलीमा समस्या भए अब संस्थाहरुले कर्जा असुली न्यायाधिकरण माफर्त प्रक्रिया अगाडि बढाउन सक्ने भएका छन् । सरकारले केहि समय अगाडि कर्जा असुली न्यायाधिकरण गठन गरेकाले  सहकारी संघ संस्थालाई ऋण असुलीको लागि वैधानिक बाटो खुलेको हो । संघ संस्थाले ऋण असुलीका लागि यथेष्ट प्रयास तथा कारवाही गर्दा समेत ऋण असुली हुन नसकेमा कर्जा असुली न्यायाधिकरणमार्फत प्रक्रिया अगाडि बढाउन सहकारी विभागले भनेको छ ।

विभागले हालै जारी गरेको एकीकृत निर्देशन २०८२ मा संस्था स्वंयले ऋण असुलीको प्रयास गर्दा पनि असुली हुन नसकेको अवस्थामा ऋण असुलीका लागि न्यायाधिकरण समक्ष उजुरी दिन भनिएको छ । सहकारीबाट ऋण लिएर समयमा ऋणको साँवा ब्याज भुक्तानीमा आलटाल गर्ने सदस्यहरुलाई प्रचलित कानुन अनुसार कारवाही गरि ऋण असुली गर्न समेत निर्देशनमा उल्लेख  छ । त्यसैगरी सहकारी संस्थाबाट ऋण लिएका सदस्यहरुले ऋण लिँदाको बखतमा तोकिएको शर्त बमोजिम साँवा ब्याजको किस्ता तोकिएकै समयमा तिनुपर्ने  छ ।

सहकारी संघ संस्थाले सदस्यलाई लगानी गरेको ऋण तोकिएको समयभित्र असुल गर्नुपर्ने र ऋण असुलीका लागि संस्थाले प्रचलित कानुन, संस्थाको विनियम र ऋण नीति समेतका आधारमा सम्पूर्ण प्रक्रिया अपनाई यथेष्ट प्रयास गर्नुपर्ने छ । त्यसैगरी सहकारी संघ संस्था वा सदस्यहरुलाई हानी नोक्सानी पु¥याउने उदेश्यले नियम विपरित वा प्रक्रिया नपु¥याई लगानी गरिएको ऋण असुली हुन नसकेमा त्यस्तो निर्णयमा सहभागी हुने पदाधिकारी र सञ्चालक समिति नै जिम्मेवार हुनेछन् ।