झापाको दमकमा मुख्य कार्यालय रहेको मेची बहुउद्देश्यीय सहकारी संस्थाको समग्र सुचाङ्कहरुमा वृद्धि भएको छ । आर्थिक मन्दीका बिचमा पनि आर्थिक बर्ष २०८१÷८२ को असार मसान्तसम्म समग्र सुचाङ्कहरुमा  वृद्धि भएको संस्थाले जनाएको छ ।

संस्थाका प्रमुख कार्यकारी  अधिकृत खोमप्रसाद बगालेले गत आर्थिक बर्षको असार मसान्तसम्म संस्थाको शेयर पुँजी, सदस्य,ऋण लगानी, वासलात र मुनाफामा वृद्धि भएको बताए । गत असार मसान्तसम्म संस्थाले सदस्यतामा ८.९९ प्रतिशत, शेयर पुँजीमा ६.७६ प्रतिशत, बचतमा २३.५२ प्रतिशत,कर्जा लगानीमा ८.०६ प्रतिशत र वासलातमा १७.८३ प्रतिशतले वृद्धि भएको उनले जानकारी दिए । संस्थाले गत आ.ब.मा ८ करोड मुनाफा आर्जन गर्न सफल भएको छ ।

संस्थाको गत जेठ मसान्तसम्म शेयर पुँजी ३० करोड ५५ लाख, जगेडा कोष २१ करोड ६५ लाख, अन्य कोष ७ करोड २ लाख र कुल बचत ३ अर्ब ७१ करोड ६१ लाख रहेको छ । त्यस अवधिमा संस्थाले ३ अर्ब ५५ करोड ५६ लाख ऋण लगानी गरेको छ । संस्थाको कुल सम्पत्ति ४ अर्ब ४६ करोड ९१ लाख  पुगेको छ । संस्थामा १७ हजार ६ सय भन्दा माथि सदस्य रहेका छन् ।

संस्थाले सदस्यहरुका लागि सहुलियत मुल्यमा घर निर्माण गरी हस्तान्तरण गरिसकेको छ भने  पिउने पानी उद्योग समेत सञ्चालनमा ल्याएको छ ।