भक्तपुर जिल्ला बचत तथा ऋण सहकारी संघ लि.को शिक्षा तथा सस्ंथागत उपसमितिको आयोजनामा र नेफ्स्कूनको साझेदारीमा एक दिने सहकारीमा जोखिम व्यवस्थापन तालिम  सम्पन्न भएको छ । तालिममा संघका अध्यक्ष कृष्णगोविन्द लाखाजूले सहकारीमा जोखिम धेरै भएकोले जोखिमलाई न्यूनीकरण गरेर कार्य गर्नुपर्ने बताए ।

उनले  राष्ट्रिय सहकारी नियमन प्राधिकरणले बचत तथा ऋणको मुख्य कारोवार गर्ने सहकारी संस्थाहरूको लागि जारी गरेको मापदण्ड सहकारीमा जोखिम घटाउन ल्याएको तर हाल तत्काल कार्यान्वयन गर्नुपर्दा उल्टो जोखिम बढाएको बताए । उनले हालको मापदण्ड अनुसार संस्थाले सदस्यको बचत संकलनको सिमाले बचत फिर्ताको चाप बढ्ने र लामो समयका लागि लगानी गरेको ऋणको सावाँ व्याज असुल उपर नहुँदा संस्थामा तरलता जोखिम बढाउने जनाए । सहकारीमा संचालक, लेखासमिति, कर्मचारी र सदस्यहरुबाट समेत जोखिम हुने भएकोले ती जोखिमलाई न्यूनिकरण गर्न संस्था सहकारीको सिद्धान्त अनुसार नीति, विधि र प्रविधिमा आधारित भएर संचालन गर्नुपर्ने उल्लेख गरे ।

संघका सचिव जगनाथ प्रजापतिले जोखिम हरेक क्षेत्रमा हुने कुरा राख्दैं जोखिम बहन गर्न सक्ने जोखिम मात्र लिनुपर्ने जनाए । सहकारीमा जोखिमलाई पहिचान गरी जोखिम न्युनिकरणका उपायहरु अबलम्बन गर्न सकोस् भनी तालिमको आयोजना गरेको उल्लेख गरे । संघका प्रमुख कार्यकारी अधिकृत बालकृष्ण धोजुले सहकारी संचलानमा आन्तरिक र बाह्य जोखिम हुने भएकोले आन्तरिक जोखिमलाई संस्थाका संचालक र व्यवस्थापनले जोखिम न्युनिकरणका लागि भुमिका खेल्नुपर्ने बताए । उनले सहकारीमा चुनौतीपूर्ण ऐन नियम र मापदण्डले संस्था संचालनमा बाह्य जोखिमको बढाएको जिकिर गरे ।

नेपाल बचत तथा ऋण केन्द्रिय सहकारी संघ लि.का तालिम अधिकृत उमेश कोईरालाले जोखिमको परिचय, जोखिमको प्रकार, सहकारीमा जोखिमबाट बच्ने उपाय विषयहरुमा प्रयोगात्मक ढंगबाट सहजिकरण गरेका थिए ।  तालिममा सहभागीहरुमध्येबाट चमेली कल्याणकारी साकोसका  व्यवस्थापक सुदर्शन चौलागाईले सहकारी संचालनका जोखिम न्यूनिरणका लागि महत्वपूर्ण भूमिका खेल्ने बताए ।  सो तालिममा संघमा आवद्ध सदस्य संस्थाहरुबाट १९ जनाको उपस्थिति रहेको थियो ।