सहकारी पीडितहरुले  आफुले राखेको बचत फिर्ता नपाएको भदै आज काठमाडौंमा अर्धनग्न प्रदर्शन गरेका छन् । उनीहरुले सहकारीमा जम्मा गरेको बचत फिर्ता पाउनु पर्ने माग सहित पटकपटक प्रदर्शन गर्दै आएका  छन् ।

सरकारले सहकारी पीडितको आवाज नसुनेको भन्दै  उनीहरुले सरकारलाई दवाव दिन अर्धनग्न भएको बताएका छन् । सरकारले आफ्नो आवाज नसुने पूर्ण रुपमा नग्न हुने पीडितहरुले चेतावनी दिए । सरकारले पीडित बचतकर्तासँग पटक पटक बार्ता गरे भए पनि त्यसको कार्यान्वयन नगरेको भन्दै दवाव दिन यो प्रदर्शन गरेको प्रतिक्रिया दिएका छन् । आफ्नो न्याय खोज्न अर्धनग्न भएको र सरकारले आफ्नो माग पुरा नगरे जस्तोसुकै आन्दोलन गर्ने उनीहरुको भनाई छ । सहकारीमा राखेको बचत पाउनुपर्ने उनीहरुको माग छ । उनीहरुले सहकारी पीडितको आन्दोलन रहर नभई बाध्यता हो, हाम्रो धैर्यलाई कम्जोरी नठान, हामी मर्न तयार हुन्छौं तर मारेर मर्छौं भन्ने जस्ता कार्ड बोकेर प्रदर्शनमा उत्रिएका थिए ।

शहरमा खुलेका कतिपय सहकारी संस्थाले सदस्यको अर्बौ बचत अपचलन गरेका छन् । लामोसम्म पनि पीडित बचतकर्ताले सहकारी संस्थामा राखेको बचत फिर्ता पाउन सकेका छैनन् । उनीहरुले लामो समयदेदि सहकारीमा राखेको बचत फिर्ता पाउनु पर्ने माग गर्दै आएका छन् । 

सम्बन्धित सहकारी संस्थाका सञ्चालक र सहकारी संस्थाको चलअचल सम्पत्ति विक्री गरेर पीडित बचतकर्ताको बचत फिर्ता गर्ने सहकारी मन्त्री बलराम अधिकारीले बताउँदै आएका छन् । सरकारसँग बचत फिर्ताको लागि स्रोत नभएको भन्दै  संस्थाहरुबाट नै असुलउपर गरेर बचत फिर्ता गर्ने उनको भनाई छ । हालसम्म सरकारले ३ अर्ब भन्दा बढी रकम फिर्ता गरिसकेको र समस्याग्रस्त घोषणा गरिएको २३ सहकारी संस्था मध्ये ३ वटाको दायित्व भुक्तानी भइसकेको समेत उनले बताएका छन् ।