आज देशभरी विभिन्न कार्यक्रमको आयेजना गरी ६८औं राष्ट्रिय सहकारी दिवस मनाइदैँ छ । २०१३ साल चैत्र २० गते चितवनमा स्थापना भएको बखान ऋण समितिलाई पहिलो सहकारी संस्थाको रुपमा लिएर नेपालमा सहकारी दिवस मनाउन सुरु गरिएको हो ।

राष्ट्रिय सहकारी महासंघले यस बर्षको सहकारी दिवसको थिम ‘मर्यादित सहकारीः समुन्नत समाज’ भन्ने तय गरेको छ । यही थिममा आधारित भएर देशभरका सहकारी संघ \संस्थाले विभिन्न कार्यक्रम आयोजना गरी रहेका छन् ।  सहकारी दिवसको अवसरमा नेपाल सरकार र सहकारी अभियानको संयुक्त  आयोजनामा  आज काठमाडौंमा  विशेष कार्यक्रम हुँदैछ । कार्यवाहक प्रधानमन्त्री  प्रकाशमान सिंहको प्रमुख आथित्यतामा राष्ट्रिय सभा गृहमा विशेष कार्यक्रम हुने राष्ट्रिय सहकारी महासंघकी अध्यक्ष ओमदेवी मल्लले बताइन् ।  काठमाडौं उपत्यकाका सहित काभ्रेपलाञ्चोक जिल्लाका सहकारीकर्मीहरु सभा गृहमा सहभागि भएर ६८औं राष्ट्रिय सहकारी दिवस तथा अन्तर्राष्ट्रिय सहकारी वर्ष २०२५ भव्य रुपमा मनाउन लागिएको अध्यक्ष  मल्लले जानकारी दिइन् ।

उनले महासंघले राष्ट्रिय सहकारी गान तयार गरेको  र आज त्यसलाई विमोचन गर्ने जानकारी दिइन्। त्यसका साथै महासंघले सहकारी झन्डा बनाएरको र त्यसको पनि डिजिटल माध्यमबाट उद्घाटन गरिने उनको भनाई छ । सहकारी दिवसको थिममा भूमि व्यवस्था, सहकारी तथा गरिबी निवारण मन्त्रलायका सचिव अर्जुन प्रसाद पोखरेलले कार्यपत्र प्रस्तुत गर्ने छन् । सहकारी मर्यादित भए भने मात्र समुन्नत समाज निमार्ण गर्न सकिने उनले बताइन् । 

भूमि व्यवस्था, सहकारी तथा गरिबी निवारण मन्त्री बलराम अधिकारीको अध्यक्षतामा कार्यक्रममा न हनेछ । राष्ट्रिय सहकारी दिवस एवम् अन्तराष्ट्रिय सहकारी वर्ष मनाउन १५१ सदस्यीय मूल समारोह समिति र २५ सदस्यीय कार्य व्यवस्थापन समिति समेत गठन गरिएको थियो । मूल समारोहको संयोजकमा भूमि व्यवस्था, सहकारी तथा गरिबी निवारण मन्त्री बलराम अधिकारी र सहसंयोजकमा राष्ट्रिय सहकारी महासंघकी अध्यक्ष ओमदेवी मल्ल रहेकी छिन् ।विगत एक हप्तादेखि रक्तदान,सरसफाई, गोष्ठी,सहकारी अन्तरक्रिया तथा सचेतना जस्ता विभिन्न कार्यक्रम गरी देशभरी सहकारी दिवस मनाई राखिएको छ ।