सरकारले ल्याएको सहकारी  अध्यादेश प्रतिस्थापन विधेयकबाट पारित गर्ने आज अन्तिम दिन रहेको छ । सरकारले गत पुस १४ गते सहकारी सम्बन्धी केही नेपाल ऐनलाई संशोधन गर्ने अध्यादेश  ल्याएको  थियो । 

उक्त अध्यादेश  प्रतिनिधि सभाबाट पारित भएर राष्ट्रिय सभामा पुगेको छ । भूमि  व्यवस्था, सहकारी तथा गरिबी निवारण मन्त्री बलराम अधिकारीले  राष्ट्रिय सभामा बहुमत नपुगेकाले अध्यादेश पास गर्न समस्या भएको बताए ।  हिजो नेफ्स्कूनले आयोजना गरेको एक कार्यक्रममा बोल्दै उनले सहकारी अध्यादेश पारित गर्ने  सोमबार  अन्तिम दिन रहेको र प्रतिपक्षलाई समेटेर अधयादेश पारित गर्ने  बताएका थिए । आज १२ बजेसम्म सहकारी अध्यादेश पारित गर्ने सयय सीमा रहेकाले त्यसका लागि आफु छलफल र वार्तामा लागि रहेको उनको भनाई थियो । सहकारीका वर्तमान समस्या समाधन गर्न र यो क्षेत्रलाई व्यवस्थित र मर्यादित बनाएर लैजान अध्यादेश मार्फत ऐन संशोधन गर्नु परेको मन्त्री अधिकारीको भनाई छ ।  

अध्यादेश संसद सुरु भएको ६० दिनभित्र ऐनमा रुपान्तरित भइसक्नपर्ने संवैधानिक व्यवस्था अनुसार आज प्रतिस्थापन विधेयक पारित गरिसक्नुपर्ने बाध्यता सरकारलाई छ । यसअघि कुलमान घिसिङको विषयमा प्रतिपक्षीले प्रधानमन्त्रीको जवाफ मागेर संसद अवरुद्ध गरेपछि यो प्रक्रिया अघि बढ्न सकेको थिएन । आज प्रधानमन्त्री केपी शर्मा ओलीले संसदको सुरुमै सम्बोधन गर्ने सहमति भएपछि विधेयक पनि पारित हुने भएको हो । दुवै सदनबाट पारित भएपछि यो विधेयक राष्ट्रपतिकहाँ पुगेर प्रमाणीकरण हुनेछ ।  

सहकारी अध्यादेशसँगै सरकारले  पुस २९  सुशासन प्रवद्र्धन तथा सार्वजनिक सेवा प्रवाहसम्बन्धी अध्यादेश, आर्थिक कार्यविधि तथा वित्तीय उत्तरदायित्व अध्यादेश, निजीकरण (पहिलो संशोधन) अध्यादेश र आर्थिक तथा व्यावसायिक वातावरण सुधार र लगानी अभिवृद्धिसम्बन्धी अध्यादेश पारित गरेर प्रतिस्थापन विधेयक ल्याइएको हो ।  ५ वटै अध्यादेश प्रतिस्थापन विधेयक प्रतिनिधि सभाबाट पारित भएर राष्ट्रिय सभामा पुगेको  छ ।