भक्तपुर जिल्ला बचत तथा ऋण सहकारी संघको तालिम व्यवस्थापन उपसमितिको आयाजना र नेफ्स्कूनको प्राविधिक साझेदारीमा “कार्यविधि निर्माण” तालिम सम्पन्न भएको छ । संघका अध्यक्ष कृष्ण गोविन्द लाखाजुले संस्था संस्थागत भई दिगो हुन नीति, विधि र प्रविधिबाट संचालन हुनुपर्ने  बताए । नीति र विधि विना व्यक्तिगत निर्णयबाट संचालित सहकारी, सहकारी नभई एक्लौटी व्यवसाय जस्तो  हुने उनको भनाई छ ।

 सरकारले जारी गरेको अध्यादेशले कुनै एक प्रकृतिको संस्थामा सदस्य भएपछि अर्को सोही प्रकृतिको संस्थामा सदस्य हुन नपाउने व्यवस्था व्यवहारिक नभएको उनको दावी छ । व्यक्तिगत बचतको सीमालाई सस्ंथागत पुँजीको १० प्रतिशतसम्म सदस्यसँग बचत संकलन गर्न पाउने गरी प्रतिस्थापन विद्येयक पारित गरेको उनले जानकारी दिए ।  संघका प्रमुख कार्यकारी अधिकृत बालकृष्ण धोजुले संस्था संचालन गर्न बचत, ऋण, आर्थिक प्रशासन, कर्मचारी प्रशासन र सम्पत्ति शुद्धिकरण निवारण कार्यविधि लगायतका आधारभूत कार्यविधि आवश्यक पर्ने बताए । कार्यविधि काम गर्ने विधि भएकाले उक्त विधिलाई उत्कृष्ट बनाउन निरन्तर प्रयोग र समयानुकुल परिमार्जनमा ध्यानदिनुपर्ने उनले सुझाए ।

नेफ्स्कूनका तालिम अधिकृत रबिन्द्र श्रेष्ठले कार्यविधि निर्माण गर्दा गाह्रो भएता पनि कार्यविधिले कानुन सम्मत कार्यान्वयन गर्न सहयोग गर्ने बताए ।  तालिममा सिकेका कुराहरुको अभ्यास नगरिकन सिक्न नसक्ने भएकोले निरन्तर अभ्यास गर्नुपर्नेमा उनको जोड थियो । उनले कार्यविधि निमार्णले काम गर्न सहजता समेत हुने बताए । तालिममा सहभागीहरुले सहकारीको कार्यविधि निर्माण प्रयोगात्मक सिकाई भएकाले खुशी व्यक्त गरे ।  तालिममा संघमा आबद्ध संस्थाहरुका पदाधिकारी, व्यवस्थापक तथा उच्चतहका कर्मचारीहरु गरी ३४ जनाको सहभागिता रहेको थियो ।