नेपालपत्र संवाददाता
पाल्पाको रामपुरमा मुख्य कार्यालय रहेको अन्धकारमुक्ति बचत तथा ऋण सहकारी संस्थाले कर्मचारीहरुको क्षमता अभिवृद्धि तालिम आयोजना गरेको छ । संस्थाले कर्मचारीहरुको क्षमता विकासका लागि दुई दिने तालिम आयोजना गरेको हो ।
संस्थाका अध्यक्ष सागर प्रसाद देवकोटाको अध्यक्षता एवं नेपाल वचत तथा ऋण केन्द्रीय सहकारी संघ लि।( नेफ्स्कून)की संचालक ज्ञानु पौड्यालको प्रमुख आथित्यतामा तालिम सम्पन्न भएको हो । प्रमुख अतिथि पौड्यालले समय समयमा हसियालाई धार लगाउनु परे जस्तै कर्मचारीहरुलाई पनि पुर्नताजकिकरण गर्न तालिम आवश्यक पर्ने धारणा राखिन् । तालिम तालिमका लागि मात्र नभई राम्रा कुरा व्यवहारमा ल्याउनु पर्ने उनको धारणा छ ।
तालिममा जन उत्थान साकोसका प्रमुख कार्यकारी अधिकृत रनबहादुर थापा र राष्टि«य सहकारी बैंक लुम्विनी प्रदेश प्रमुख नारायण वेलवासेको सहजीकरण तथा प्रशिक्षण दिएका थिए । संस्थाका व्यवस्थापक दिपेन्द्र प्रसाद पौडेलको स्वागत मन्तव्यबाट शुरु भएको कार्यक्रमको संचालन संस्थाको ऋण अधिकृत रामचन्द्र ढुङ्गाना गरेका थिए । कार्यक्रममा संस्थामा कार्यरत ३३ जना कर्मचारीहरुको सहभागिता रहेको थियो । तालिम समापनको अवसरमा सहभागिहरुलाई प्रमाण प्रत्र प्रदान गरिएको थियो ।
संस्थाले यस आर्थिक बर्षको माघ मसान्तसम्म १५ करोड ८४ लाख १८ हजार शेयर पुँजी, १३ करोड जगेडा कोष , २ करोड ३३ लाख अन्य कोष र कुल संस्थागत पुँजी १४ करोड ९ लाख ९६ हजार पुर्याएको छ । त्यसैगरी संस्थाले १ अर्ब २३ करोड ४० लाख बचत संकलन गरी १ अर्ब १२ करोड ५२ लाख ऋण लगानी गरी कुल सम्पत्ति १ अर्ब ६६ करोड ८८ लाख रहेको छ । संस्थामा ११ हजार २ सय ७३ सदस्य आवद्ध रहेका छन् ।
