शुभकामना बचत तथा ऋण सहकारी संस्थाले “स्ट्रोक सम्बन्धी सचेतना कार्यक्रम”  आयोजना गरेको छ  । संस्थाले  रजतवर्ष २०८१ को अवसरमा शिक्षा उपसमिति र सामाजिक क्रियाकलाप उपसमितिको संयुक्त आयोजनामा सक्षम हेल्थ केयर एण्ड रिहाविलिटेशन सेन्टरको प्राविधिक सहयोगमा  उक्त कार्यक्रम आयोजना गरेको हो ।  

कार्यक्रममा स्ट्रोक सम्बन्धी बरिष्ठ डक्टर न्युरो सर्जन  नरेन्द्र सालिकेबाट सहजीकरण  गरिएको थियो  । उनले स्ट्रोक के हो ? र कसरी हुन्छ , यसको लक्षण र रोकथाम तथा उपचार बारेमा विस्तृत जानकारी  गराएका थिए  । यस रोगका बिरामीहरु बढ्दै गइरहेको हुनाले यस सम्बन्धी जानकारी लिई समयमै रोकथाम गर्नका लागि विशेष ध्यान दिनु पर्ने उनको भनाई छ । 

शिक्षा उपसमिति संयोजक  सृजना कोजूले उपस्थित सबैलाई स्वागत गर्दै  कार्यक्रम आयोजना गर्नुको उद्देश्य माथि प्रकाश  पारेका थिए । संस्थाका सचिव  पुष्पलाल तिमिलाले शुभकामना साकोसको संक्षिप्त परीचय दिदै संस्थाले सदस्यहरुसँग वित्तिय कारोबारका साथसाथै सामाजिक कार्यक्रमहरु गर्दै आइरहेको बताए ।  यसै अनुरुप सदस्यहरुको स्वास्थ्य सम्बन्धी शिविर तथा सचेतना कार्यक्रमहरु पनि गर्ने गरेको  उनको भनाई छ ।  संस्थाका प्रबन्धक रेश्मी श्रेष्ठले संचालन गरेका सो कार्यक्रममा उपस्थिति  सदस्यहरुले  कार्यक्रम उपलब्धिमूलक रहेको प्रतिक्रिया दिए ।