बहुभाषिक कवि सन्तोष कुमार पोखरेलका तीन वटा काव्य कृतिको लोकार्पण भएको छ । काठमाडौंको पुतलीसडकस्थित ग्रीनलीफ फूडमा सम्पन्न कृति लोकार्पण तथा अन्तर्क्रियाका अवसरमा कवि पोखरेलका हालै  प्रकाशित 'शून्यको यात्रा र अन्य कविता' को लोकार्पण गरिएको हो । त्यसै अवसरमा कविका कृति ‘द वार एण्ड अदर पोयम्स’ तथा ‘पहाड और सागर तथा अन्य कविताएँ' समेत तीनै कृतिमाथि समीक्षा गरिएको थियो।

नेपाल प्रज्ञा प्रतिष्ठानका सदस्य-सचिव धनप्रसाद सुवेदी, प्रा. संजीता बर्मा, राधेश्याम लेकाली, प्रा. भागवत ढकाल, सरीता अर्याल र लेखक सन्तोष कुमार पोखरेलले संयुक्तरुपमा पुस्तक लोकार्पण गरेका थिए।

नेपाली काव्य कृतिको समीक्षा अम्बिका अर्यालले गरेकी थिइन् भने हिन्दी र अङ्ग्रेजी काव्य कृतिका समीक्षक क्रमश: डिल्लीराम शर्मा संग्रौला र केशव सिग्देल थिए । गीता रेग्मीको कुशल संचालनमा संपूर्ण कार्यक्रम रोचक र सफल रह्यो। तीनवटा भाषामा लेखिएका एउटै लेखकका विभिन्न तीन कृतिहरूमाथि एकैदिन एकैपटक अन्तरक्रिया कार्यक्रमको आयोजना गरिएको संभवत: यो पहिलो पटक हो।

कवि पोखरेल विश्वकवि, विश्वका स्वर्णकवि, अन्तर्राष्ट्रिय उत्कृष्ट कवि र रसियाको सुनको प्वाँख जस्ता अन्तर्राष्ट्रिय पदवीहरूबाट अलंकृत नेपालका पहिलो साहित्यकार हुन् । गत सेप्टेम्बर महिनामा कविको रसियाको भ्रमणका दौरान भएका साहित्यिक सम्मेलनहरूमा पोखरेललाई म्याक्सिम गोर्की मेडल र रसियाको सुनको प्वाँख मेडलबाट विभूषित गरिएको थियो।

पोखरेलका रचनाहरू मन छुने र विचारोत्तेजक हुन्छन्। उनका कृतिहरु चालिस भाषामा अनुवाद भइसकेका छन्। काठमाडौंका प्रमुख पुस्तकपसलमा पोखरेलका कृतिहरू किन्न पाइन्छन् ।