नेपालपत्र संवाददाता
मेरो प्रेमलाई
मैले सयौं पटक इन्कार गरेकी हूँ
घरी प्रेम घरी तिरस्कार गरेकी हूँ
अनि हजार पल्ट हारेकी हूँ
म आफैंलाई, अनि मेरो मुटु
फगत तिम्रो एक नजरमा,
अब म कसोरी तिमीबाट छुटूँ
मलाई केही थाहा छैन
म त्यहाँ डुबेँ, म हराएँ
तिमी भित्र स्वयं र मभित्र तिमीलाई पाएँ।
सुन ! प्रेमोद्गार हो मेरो अनुपम
अब म तिम्रै हुन चाहन्छु
मेरो प्रियतम !
तिमी सगर हौ मेरो
म सागर बनी तिम्रो बिम्ब मेरा छातिमा टाँसिराख्छु
तिमीलाई हेरिराख्छु अनि हाँसिराख्छु
तिमी प्रत्येक बिहान पहिलो दर्शन दिन्छौ!
म मेरा लहरहरूले अभिवादन गर्छु।
तिम्रा बादलहरूलाई अङ्गालोमा बाँधेर
यो प्रेम अमर बनाउँछु
अजर बनाउँछु।
यो सृष्टिमा म फगत तिम्रै हूँ
अनि तिम्रै रहन्छु हरदम
मेरो प्रियतम
