नवजागरण बचत तथा ऋण सहकारी संस्थाको समग्र वित्तीय सुचाङ्कहरुमा वृद्धि भएको छ । संस्थाले प्रकाशित गरेको गत आर्थिक वर्षको असार मसान्तसम्मको अपरिष्कृत वित्तीय विवरणले वृद्धि देखाएको हो । गत आर्थिक वर्षको तुलनामा संस्थाको कुल सम्पत्तिमा वृद्धि भएको व्यवस्थापक रमेश उदासले जानकारी दिए । सदस्यहरुको विश्वासको कारण संस्थामा बचतको मात्र उल्लेख बढेको उनको भनाई छ ।
गत असार मसान्तसम्म शेयर पुँजी ६ प्रतिशतले वृद्धि भई ४ करोड ४८ लाख ४० हजार,जगेडा कोष ८.६८ प्रतिशतले वृद्धि भई ६ करोड ४७ लाख ६२ हजार र अन्य कोषहरुमा ०.८९ प्रतिशतले वृद्धि भई ६६ लाख पुगेको छ । त्यसैगरी बचत संकलन ७८.२० प्रतिशतले वृद्धि भई ५८ करोड ३३ लाख ५३ हजार, ऋण लगानी ५२.८६ प्रतिशतले वृद्धि भई ३९ करोड ४३ लाख ५२ हजार र कुल संस्थागत पुँजी ८.८७ प्रतिशतले वृद्धि भई ६ करोड ६२ लाख पुगेको छ । संस्थाको विभिन्न बैक तथा वित्तीय संस्थामा गरेको लगानी ४७.२९ प्रतिशतले बढेर २७ करोड ५८ लाख ७७ हजार पुगेको छ ।
संस्थाले असार मसान्तसम्म ३ करोड ७९ लाख ५८ हजार तरलता राखेको छ । मासिक रुपमा सदस्यहरुबाट बचत संकलन हुने र ऋणको माग कम भएकाले संस्थाले सिमित रकम मात्रै तरलताको रुपमा राखेको छ । ९ हजार ८६४ जना शेयर सदस्य रहेको संस्थामा ७३० जना सदस्यले ऋण उपभोग गरेको छन् । संस्थाले ऋण लगानीको क्षेत्र पहिचान गरी सदस्यहरुमा ऋण लगानी बढाउनु पर्ने अहिलेको आवश्यकता देखिएको छ । यस अवधिमा संस्थाको कुल सम्पत्ति ७४ करोड ५९ लाख ९१ हजार पुगेको छ ।
