याङरिमा बचत तथा ऋण सहकारी संस्थाको १३औं वार्षिक साधारण सभा सम्पन्न भएकोछ । सभाले जिल्ला सहकारी संघ काठमाण्डौका अध्यक्ष ज्ञानबहादुर तामाङको प्रमुख आतिथ्यता सम्पन्न साधारणसभाले निर्मल कुमार बञ्जाराको अध्यक्षतमा नयाँ कार्यसमिति चयन गरेको छ ।
संस्थाको उपाध्यक्षमा जिमी लामा, सचिव पासाङ नुर्पु लामा, कोषाध्यक्षमा सानुबाबु गिरी र सदस्यहरुमा डिण्डु लामा, अनिता कुमारी लामा र सुनिता लामा रहेका छन् । त्यसैगरी लेखा सुपरीवेक्षण समितिको संयोजकमा शिवप्रसाद भण्डारी र सदस्यहरुमा विनिता चालिसे र नुर्पु डोल्मा लामा चयन भएका हुन् ।
सभामा अध्यक्ष बञ्जाराले प्रतिवेदन प्रस्तुत गर्दै २०६६ साल जेष्ठ २२ गते विधिवत् रुपमा दर्ता भई सहकारी मुल्यमान्यता र सिद्धान्त अनुरुप संस्था सञ्चालन हुँदै आएको बताए । संस्था नेफ्स्कुनले सञ्चालन गरेको कर्ब्स कार्यक्रममा आवद्ध रहेको र त्यसले संस्थालाई थप व्यवस्थित बनाउन सहयोग पुग्ने उनले जनाए ।
संस्थाका कोषाध्यक्ष सानुबाबु गिरीले आर्थिक प्रतिवेदन प्रस्तुत गर्दै आ. व. २०७७/७८ को असार मसान्तसम्म शेयरपुँजी २ करोड १९ लाख ५३ हजार, कोषहरु १ करोड १८ लाख ४७ हजार, बचत १४ करोड ९ लाख ९६ हजार र ऋण लगानी १३ करोड ३७ लाख ७६ हजार पुगेको जनाए । संस्थाको कुल वासलात १८ करोड १० लाख ३६ हजार पुगेको छ ।
संस्थाले सदस्यहरुबाट ससानो बचत संकलन गरी सदस्यहरुको आवश्यकता र माग अनुसार ऋण लगानी गर्दै आएको छ । त्यसैगरी सदस्यहरुलाई सहकारी शिक्षा, रक्तदान, महिला सशक्तिकरण, सरसफाई, वृक्षारोपण जस्ता गतिविधिमा पनि संस्था सक्रिय छ भने सदस्यहरुलाई आइएमई, प्रभु, वेष्टर्न, हिमाल जस्ता रेमिट्यान्स सुविधाहरु प्रदान गर्दै आइरहेको छ । संस्थाले आफ्नै भवन बनाउने दीर्घकालिन लक्ष्य समेत अघि सारेको छ ।
