कुम्भेश्वर महिला बचत तथा ऋण सहकारी संस्थाको १६ औं वार्षिक साधारण सभा सम्पन्न  भएको छ । संस्थाकी अध्यक्ष शान्त लक्ष्मी खड्गीको सभापतित्वमा भएको साधारण सभाको बागमती प्रदेश बचत तथा ऋण सहकारी संघ ( बागमती प्रोस्कून) की उपाध्यक्ष कल्पना श्रेष्ठले  सभाको उद्घाटन गरेकी थिइन् ।

साधारण सभामा श्रोतको व्यक्तिको रुपमा बोल्दै उनले सहकारी क्षेत्रले मुलुकको आर्थिक तथा सामाजिक रुपान्तरणमा खेलेको भूमिकाको विषयमा चर्चा गरेकी थिइन् । उनले सहकारी मार्फत् महिलाहरुको जीवनस्तरमा आएको परिवर्तनका साथै आर्थिक रुपमा समेत आत्मनिर्भर बनाउन महत्वपूर्ण भूमिका खेलेको जनाइन् । पछिल्लो समय नियामक निकायले जारी गरेको निर्देशनले सहकारी संघ संस्थामा पारेको अप्ठ्याराको विषयमा समेत उनले सभामा उल्लेख गरिन् ।  साधारण सभामा संस्थाका कानुनी सल्लाहकार लक्ष्मण महर्जनले समेत सहकारीको महत्वको वारेमा चर्चा गर्दै मासिक बचतको महत्वको वारेमा सदस्यहरुलाई जानकारी दिए । उनले टोलछिमेकमा रहेका कतिपय सहकारी संस्थाले सदस्यको बचत दुरुपयोग गरेको भन्दै कुम्भेश्वर महिलाले भने सदस्यहरुको उन्नतिमा काम गर्दै आएको बताए ।

 सभामा अध्यक्षको तर्फबाट वार्षिक प्रतिवेदन प्रस्तुत गर्दै अध्यक्ष खड्गीले संस्थाले स्थापना कालदेखि नै सदस्यहरुको आर्थिक तथा सामाजिक रुपान्तरण गर्ने उदेश्यका साथ आफ्ना गतिविधिहरु सञ्चालन गर्दै आएको बताइन् । उनले सदस्यबाट संकलित बचतलाई आवश्यकता अनुसार ऋण लगानी गर्ने,उद्यमशीलता विकास गर्ने,वित्तीय साक्षरता अभिवृद्धि गर्ने र सदस्यहरुलाई सवल बनाउने काम गर्दै आएको उनको भनाई छ ।  

संस्थाको मुख्य आधार सदस्यहरु भएको र आगामी दिनमा संस्थाका सम्पूर्ण गतिविधिहरु सदस्य केन्द्रीत बनाउने उनले जनाइन् । सदस्यको आवश्यकता र क्षमता अनुसार बचत तथा ऋणका नयाँ सेवा विकास गर्ने,वित्तीय साक्षरता सञ्चालन गर्ने,उद्यमशीलता तथा सीप विकासका अवसर उपलब्ध गराई सदस्यहरुको आर्थिक क्षमतामा वृद्धि गर्ने लक्ष्य संस्थाले लिएको उनले सभामा जानकारी दिइन् ।  संस्थाले प्रचलित सहकारी कानुन, नियम,मापदण्ड तथा संस्थाको विनियम र आन्तरिक कार्यविधिको पालना गर्दै संस्थागत सुशासनलाई अझ बलियो बनाउने अध्यक्ष खड्गीको भनाई छ  । आधुनिक प्रविधिको प्रयोगलाई आत्मसात गर्दै सदस्यहरुलाई अझ प्रभावकारी र  गुणस्तरीय वित्तीय सेवा प्रदान गर्ने समेत उनले उल्लेख गरिन् ।

सभामा सचिव सफलता खड्गीले आर्थिक बर्ष २०८२ \८३ को वार्षिक प्रगति प्रतिवेदन प्रस्तुत गरेकी थिइन् । उनले यस आर्र्थिक बर्षमा सदस्यको लागि सीपमुलक तालिम,सदस्य सम्मान तथा प्रोत्साहन कार्यक्रम, वित्तीय साक्षरता, स्वाीथ्य शिविर र सञ्जाल विस्तार जस्ता कार्यक्रम सञ्चालन गरिने जानकारी दिइन् । सभामा कोषाध्यक्ष रंगिता शाहीले आर्थिक बर्ष २०८२ \८३ को आर्थिक प्रतिवेदन प्रस्तुत गर्दै शेयर पुँजी १ करोड ४९ लाख ९१ हजार, जगेडा कोष १४ लाख ४८ हजार,अन्य कोषहरु १२ लाख ३१ हजार, बचत संकलन १६ करोड ९८ लाख, ऋण लगानी १४ करोड २ लाख गरी कुल सम्पत्ति २० करोड ५३ लाख पुगेको बताइन् ।

संस्थामा ८५२ जना सदस्य आवद्ध रहेका छन् । सभामा लेखा सुपरीवेक्षण समितिको तर्फबाट प्रतिवेदन प्रस्तुत गर्दै संयोजक मोनिका खड्गीले नियमित बचतलाई वृद्धि गर्न र भाखा नाघेको ऋणलाई अपलेखन गर्न सुझाव दिइन् । सभामा एस.ई.ई. सम्मान, उत्कृष्ट बचतकर्ता र उत्कृष्ट ऋणलाई सम्मान गरिएको थियो भने डोर प्राइजको समेत व्यवस्था गरिएको थियो ।