मध्यपुर थिमीस्थित शंखधर चोकमा रहेको बालकुमारी बचत तथा ऋण सहकारी संस्थाले खुल्ला रक्तदान कार्यक्रम गरेको छ । संस्थाको २२औं स्थापना दिवसको अवसरमा शंखधर चोकमा रक्तदान कार्यक्रम सम्पन्न भएको हो ।
संस्थाले आयोजना गरेको सो कार्यक्रममा ५८ जनाले रक्तदान गरेका थिए । संस्थाका अध्यक्ष तुईलाल श्रेष्ठको सभापतित्वमा भएको कार्यक्रममा सञ्चालक समिति, विभिन्न उपसमिति, कर्मचारी एवं सदस्यहरु उपस्थित रहेका थिए ।
भक्तपुर रेडक्रसको प्राविधिक सहयोगमा भएको रक्तदान कार्यक्रममा रक्तदाताहरुलाई प्रमाणपत्र र टिसर्ट प्रदान गरिएको व्यवस्थापक सुजेन्द्र श्रेष्ठले बताए । रक्तदान जीवनदान भन्ने नाराका साथ रक्तदान गरिएको र संस्था स्थापना दिवसका अवसरमा हरेक वर्ष यस्तो कार्यक्रम गर्दै आएको उनको भनाई छ ।
विभिन्न प्रकारका शल्यक्रिया, दुर्घटना, सुत्केरी लगायतका अन्य विमारीका लागि आवश्यक पर्ने रगतको अभाव पर्ने गरेको छ । पछिल्लो समय कोभिड १९ का कारण संघसंस्थाहरुले खुल्ला रुपमा रक्तदान कार्यक्रम गर्न नसक्दा झनै रगतको अभाव भइरहको छ । यस्तो अवस्थामा केहि मात्रमा भएपनि रगतको अभावलाई न्यूनिकरण गर्न पनि संस्थाले रक्तदान गरेको उनले जनाए ।
२२औं स्थापना दिवससम्म आइपुग्दा संस्थामा ५१०० सदस्य आवद्ध भइसकेका छन् भने १ अर्ब ७० करोडको कुल वासलात बनाउन संस्था सफल भएको छ । सदस्यहरुको आर्थिक, सामाजिक र साँस्कृतिक उन्नयनमा संस्थाले उल्लेख्य भूमिका खेलेको छ । सदाझैं सदस्य र समुदायको उन्नतिको लागि संस्थाले निरन्तर क्रियाशील भूमिका निर्वाह गर्दै जाने प्रतिवद्धता समेत जाहेर गरेको छ ।
