चैत महिनाबाट लागु हुने गरी अधिकांश वाणिज्य बैंकहरूले निक्षेपमा दिने ब्याजको दर घटाएका छन्। २० वटा बाणिज्य बैंक मध्ये प्रभु र ग्लोबल आईएमईले फागुनकै दरलाई निरन्तरता दिएका छन् भने बाँकी १७ बैंकले घटाएका छन् भने एनआइसी एशियाले भने ब्याजदर बढाएको छ । 

बैंकहरूले सार्वजनिक गरेको नयाँ ब्याजदर तालिकाअनुसार चैत्र महिनामा   मुद्दती खातामा दिइने औसत ब्याजदर ७.२५ प्तिशत हुने देखिन्छ । फागुनमा औसत ब्याजदर ७.७५ प्रतिशत रहेको थियो ।

बैंकिङ प्रणालीमा अधिक तरलता र कर्जा प्रवाह न्यून भएसँगै बैंकहरुले ब्याजदर घटाउँदै लगेका छन् ।

एनआईसी एसिया बैंकले फागुनको तुलनामा चैतमा व्यक्तिगत मुद्दती निक्षेपमा ब्याजदर बढाएको हो। मुद्दती खातामा दिने ब्याजदर सबैभन्दा बढी ८.५४८ प्रतिशत एनआइसी एशियाको रहेकाे छ । बैंकको बारेमा केहि विवाद भएपछि फागुन महिनामा एनआइसी एशियाबाट ग्राहकहरुले निक्षेप झिकेका थिए । थप निक्षेप आकर्षित गर्न सो बैंकले  ब्याजदर बढाएको देखिन्छ ।  

मुद्दती खातामा सबैभन्दा न्यून कृषि विकास बैंकको ब्याजदर ५.६६ प्रतिशत रहेको छ । त्यसपछि एभरेष्ट बैंकको ६.५ प्रतिशत रहेको छ । बाँकी बैंकहरुले ७ देखि ७.७५ प्रतिशतसम्म ब्याजदर कायम राखेका छन् ।