तिलोत्तमा नगरपालिका–१५ कोटिहवा, रुपन्देहीमा रहेको जनउत्थान बचत तथा ऋण सहकारी संस्थाको १८ औं बार्षिक साधारण सभा सम्पन्न भएको छ । संस्थाकी अध्यक्ष ज्ञानु पौड्यालको अध्यक्षता एंव रुपन्देहीका प्रमुख जिल्ला अधिकारी गणेश अर्याललको प्रमुख आतिथ्यतामा साधारणसभा सम्पन्न भएको हो । सभा बोल्दै अर्यालले वित्तीय संकटको बीचमा पनि जनउत्थानले सदस्यका माझ राम्रो छवि बनाएको बताए ।
उनले अर्थतन्त्रको तीन मध्ये एक खम्बाको रुपमा राज्यले सहकारीलाई लिएको र त्यो अनुसार सहकारी चले कि चलेनन् भन्ने समीक्षा गर्ने बेला भएको बताए । सभामा अध्यक्ष पौड्यालले २१ बर्ष अगाडि ३१ जना सदस्यबाट मासिक एक सय रुपैयाबाट संस्था सुरु गरेको र २०६३ साल कात्तिक १ गतेबाट भने विधिवत् रुपमा कार्यालय स्थापना गरी वित्तीय कारोबार सुरु गरेको बताइन् ।
संस्थाले सहकारी संस्थाहरुसँग एकीकरण प्रक्रियालाई पनि निरन्तरता दिएको र हालसम्म ७ वटासँग एकीकरण गरिसकेको सभामा उनले जानकारी दिईन् ।संस्थाले राष्ट्रिय तथा अन्तराष्ट्रिय सहकारीका सिद्धान्तहरुलाई आत्मसात गर्दै अघि बढेको र बचत तथा ऋणको माध्यमबाट सदस्यहरुको आर्थिक, सामाजिक तथा सांस्कृतिक रुपान्तरणको लागि काम गर्दै आएको उनको भनाई छ। संस्थाले यस अवधिसम्म आईपुग्दा सदस्यहरुलाई व्यवसायिक रुपमा सक्षम बनाउन सकेकोमा उनले गर्व गरिन् । यसियाली ऋण महासंघको प्राविधिक सहयोगमा नेप्स्कूनबाट सञ्चालित एक्सेस ब्राण्डिङ कार्यक्रममा सहभागी भई संस्थाले हालै मात्र सिल्भर ब्राण्ड प्राप्त गर्न सकेको पौड्यालले बताइन् । संस्थाले गर्भदेखि स्वर्गसम्मको लागि आवश्यक पर्ने बचतका प्रकारहरु सञ्चालनमा ल्याउने, सहकारी शिक्षा कार्यक्रम सञ्चालन गरी सहकारीको महत्वका वारेमा बुझाउने र विद्यालयमा विद्यार्थी क्लब स्थापना गरी वित्तीय साक्षरता कार्यक्रम सञ्चालन गर्ने उनले जानकारी दिईन् ।
संस्थाकी सचिव सरु रानाले सभामा वार्षिक प्रतिवेदन प्रस्तुत गर्दै कुल सदस्य मध्ये १० हजार २४२ जना सदस्यले संस्थाबाट ऋण लिएर विभिन्न पेशा तथा व्यवसाय गर्दै आएको जनाइन् । संस्थाले सदस्य लक्षित विभिन्न कार्यक्रम सञ्चालन गरेको र त्यस कार्यक्रमबाट गत आर्थिक बर्षमा पनि धेरै सदस्य लाभान्वित भएको उनले सभामा जानकारी दिइन् । संस्थाले गत वर्ष सामाजिक कार्यको लागि ११ लाख ८१ हजार खर्च गरेको उनको भनाई छ । संस्थाकी कोषाध्यक्ष विष्णुमाया कुँवरले आर्थिक बर्ष २०७९/८० को आर्थिक प्रतिवेदन सभामा प्रस्तुत गर्दै गत बर्षको मुनाफाबाट सदस्यलाई १३.३० प्रतिशत लाभांश वितरण गरिने जानकारी दिइन् ।
संस्थाले गत आ.व.को असार मसान्तसम्म ४० हजार ६४३ जना सदस्यबाट ३० करोड ९७ लाख शेयर पुँजी संकलन गरेको छ । त्यसैगरी यस अवधिमा बचत संकलन २ अर्ब ५८ करोड १० लाख, ऋण लगानी २ अर्ब ५७ करोड ६ लाख र शुद्ध बचत ११ करोड ३२ लाख रहेको छ । संस्थाले गत आ.व.मा ३ अर्ब ३० करोड ९७ लाख कुल सम्पत्ति पुर्याएको छ । संस्थाको जगेडा कोषमा २८ करोड १० लाख रकम जम्मा भएको छ । रुपन्देही जिल्लाभर कार्यक्षेत्र रहेको संस्थाले १० वटा सेवा केन्द्र मार्फत सदस्यलाई वित्तीय लगायतका अन्य सेवा प्रदान गर्दै आएको छ ।
