नेपालपत्र संवाददाता
चिनीयाँ राजदूत छन सोङले नेपालले उर्जा श्रोतमार्फत विकास गर्न सक्ने औंल्याउँदै त्यसका लागि नेपालले दीर्घकालिन विकास रणनीति बनाउनुपर्ने जनाएका छन् ।
नेपाल उद्योग परिसंघ र नेपालका लागि चिनियाँ राजदूत छन सोङबीच भएको एक छलफलमा राजदूत सोङले उर्जा क्षेत्रलाई प्राथमिकता दिदै नेपालले विद्युतीय प्रयोग बढाउनुपर्ने सुझाव दिए । त्यसले आयात प्रतिस्थापनमा सहयोग गर्ने उनको आसय थियो । चीन र भारतको बीचमा भएर सानो देखिएता पनि नेपाल सानो मुलुक नभएको उनले उल्लेख गरे । नेपालको औद्योगिक विकासका लागि चीनले सहयोग गर्ने प्रतिवद्धता उनले त्यस अवसरमा जनाएका थिए ।
परिसंघका अध्यक्ष राजेशकुमार अग्रवालले चीन विकासको महत्वपूर्ण साझेदार रहेको जनाउँदै नेपाल पछि परेको पूर्वाधार क्षेत्रमा सहकार्यको आवश्यकता रहेको बताए । पूर्वाधार, प्रविधि हस्तान्तरण, सीप, पर्यटनलगायतका क्षेत्रमा चिनियाँ लगानी एवं सहकार्यलाई उच्च प्राथमिकता दिन उनले आग्रह गरे । विद्युतीय व्यापारका माध्यमबाट नेपाली वस्तु चिनियाँ बजारमा पुर्याउन सहयोग गर्न पनि उनले जोड दिए ।
अध्यक्ष अग्रवालले परिसंघ र चाइना काउन्सिल फर प्रमोसन अफ इन्टरनेशनल ट्रेड (सीसीपीआईटी) बीचको सहकार्यमा नेपालमा देखिने गरी काम गर्न लागेको समेत राजदूत सोङलाई जानकारी गराए ।
प्रधानमन्त्री पुष्पकमल दाहालको आसन्न चीन भ्रमणका विषयमा समेत त्यस अवसरमा छलफल भएको थियो । छलफलमा परिसंघका निवर्तमान अध्यक्ष विष्णुकुमार अग्रवाल, उपाध्यक्षहरु निर्वाण चौधरी, हेम राज ढकाल, रोहित गुप्ता, अमित मोर, पदाधिकारी सदस्यहरु छाया शर्मा, गोकुल भण्डारी, महानिर्देशक दीपकराज जोशीलगायत सहभागी रहेका थिए ।
