नेपाल राष्ट्र बैंकले आज चालु आर्थिक वर्ष २०८०।८१ का लागि मौद्रिक नीति सार्वजनिक गर्ने भएको छ ।
राष्ट्र बैंकले आज मध्यान्ह मौद्रिक नीति सार्वजनिक गर्ने जनाएको हो । त्यसअघि मौद्रिक नीतिबारे छलफल गर्न राष्ट्र बैंक सञ्चालक समितिको बैठक बस्दैछ ।
राष्ट्र बैंकको आर्थिक अनुसन्धान विभागले तयार गरेको मौद्रिक नीति सञ्चालक समितिको बैठकले पारित गरेपछि गभर्नरले सार्वजनिक गर्ने व्यवस्था छ । मौद्रिक नीति तर्जुमा कार्यविधि २०७३ ले आर्थिक वर्ष सुरू भएको एक साताभित्र मौद्रिक नीति ल्याउनु पर्ने व्यवस्था रहेको छ ।
साउन ४ गते बसेको प्रतिनिधि सभाको अर्थ समितिको बैठकमा बोल्दै राष्ट्र बैंकका गभर्नर महाप्रसाद अधिकारीले बजेटले तय गरेको कार्यदिशा र बजेटले लक्ष्य गरेको आर्थिक वृद्धिअनुसार नै मौद्रिक नीति आउने बताएका थिए ।
