भक्तपुर जिल्ला बचत तथा ऋण सहकारी संघले संस्थागत विकास उपसमितिको आयोजनामा दुई दिवसिय आधारभुत सहकारी लेखा तालिम सम्पन्न भएको छ । संघका उपाध्यक्ष हरि बल्लले सहभागीलाई प्रमाण पत्र वितरण गर्दै वित्तीय संस्थामा लेखा प्रणाली चुस्त दुरुस्त राख्नुपर्ने आवश्यकता औल्याए । सहकारीमा व्यवहारिक कुरालाई मात्र जोड दिदाँ लेखा प्रणाली कमजोर भई भविष्यमा समस्या देखिने उनले बताए ।
उनले सिकेको कुराहरु संस्थाको विकासका लागि प्रयोग गर्न र अरुलाई पनि सिकाउँदै जानु पर्ने बताए । यदि आफुले सिकेको भन्दा फरक र गलत अभ्यास संस्थामा भइरहेको छ भन्ने तुरुन्त सच्याउन तत्पर हुनुको साथै सहि कुराको सिकाई हस्तान्तरण गर्नुपर्ने उनको भनाई थियो । संघका सचिव एंव संस्थागत विकास उपसमितिका संयोजक जगनाथ प्रजापतिले हालको आधुनिक युगमा सफ्वेयर प्रणालीको मात्र प्रयोग हुदाँ सहकारीमा लेखा अभिलेखको प्रणाली नै थाहा नहुने जोखिम रहेको बताए । उनले म्यानुल लेखा प्रणाली नबुझ्दा सफ्वेयरले दिएको रिपोट सहि छ कि गलत छ, छुट्याउन कठिन हुने बताए । तालिममा सहभागीहरुले संस्थामा आफुलाई दिएको जिम्मेबारी इमान्दारीताका साथ निभाउनुको साथै संस्था वित्तीय प्रतिवेदन बनाउन सहयोगी भुमिका निभाउनुपर्ने उनको सुझाव थियो ।
तालिमका प्रशिक्षक तथा संघका व्यवस्थापक बालकृष्ण धोजुले लेखा सम्बन्धी औपचारिक शिक्षा र सहकारीमा प्रयोग हुने लेखा सैद्धान्तिक रुपमा एउटै भए पनि व्यवहारिक प्रयोगमा फरकता रहेको बताए । सहकारीको व्यवहारिक लेखा प्रणालीलाई बुझ्दा लेखा प्रणाली अझ सहज र सरल रहेको उनले बताए । सहकारीका कर्मचारीहरुले सहकारीको समग्र लेखा प्रणालीबारे ज्ञान हासिल गरी संस्थाको जोखिम विष्लेषण गरी जोखिम न्युनिकरणका लागि अग्रसर हुनुपर्ने उनको भनाइ थियो ।
उपसमितिका सदस्य विकुलाल सुवालले तालिमबाट सिकेका कुराहरु संस्थामा प्रयोगका लागि जोड दिए । सहभागिहरुले तालिम व्यवहारिक रहेकोले लेखाको नियम बाहेक ह्रास कट्टी, कर लगायतका कुरा प्रयोगात्मक विधिबाट सिक्न पाएँकोमा खुशी व्यक्त गरे । तालिममा आबद्ध सदस्य संस्थाहरुमध्येबाट १७ जनाको सहभागिता रहेको थियो । तालिम कार्यक्रमको समापन समारोहको संचालन संघका कर्मचारी राजन कासिछ्वाले गरेका थिए ।
