सहकारी संस्थाहरुमा बचत र पुँजी वृद्धि घटेको छ। नेपाल राष्ट्र बैंकले प्रकाशित गरेको आ.ब. २०७९/८०को अर्ध बार्षिक आर्थिक गतिविधि अध्ययनले गत बर्षको तुलनामा सहकारी संस्थामा पुँजी र बचत वृद्धि घटेको देखाएको हो ।
राष्ट्र बैंकले सातै प्रदेशमा रहेका सहकारी संस्थाहरुमध्ये हरेक प्रदेशबाट १० वटाका दरले नमुना छनौट गरि गरेको अध्ययनले यस्तो देखाएको हो । छनौटमा परेका कुल ७० सहकारी संस्थाहरूको कुल पुँजी ९.०२ प्रतिशतले बढेको छ । अघिल्लो वर्षको सोही अवधिमा यस्तो वृद्धिदर १८.१४ प्रतिशत रहेको थियो ।
समीक्षा अवधिमा उक्त सहकारीहरुको कुल बचत ०.५४ प्रतिशतले घटेको छ भने कुल कर्जा ०.७२ प्रतिशतले बढेको छ । समीक्षा अवधिमा उक्त सहकारीहरुको सदस्य संख्या १०.४४ प्रतिशतले वृद्धि भएको छ भने गत वर्षको सोही अवधिमा सदस्य संख्या १२.२० प्रतिशतले वृद्धि भएको थियो ।
समीक्षा अवधिमा सहकारीहरुको कर्मचारी संख्या ७.९२ प्रतिशतले वृद्धि भएको छ भने गत वर्षको सोही अवधिमा कर्मचारी संख्या १४.०८ प्रतिशतले वृद्धि भएको थियो ।
विश्वमा आएको आर्थिक मन्दीको प्रभाव सहकारी क्षेत्रमा सबै भन्दा बढी परेको देखिएकाे छ । सिद्धान्तबाहिर गएर चलेका कतिपय सहकारी संस्थाले सदस्यको बचत फिर्ता गर्न सकेका छैनन् । यसले गर्दा सहकारीप्रति आम सदस्यको विश्वास गुम्दै गएको छ भने सहकारीबाट बचत निकालेर बैंकमा लैजाने क्रम समेत बढेर गएको छ । यसले गर्दा सहकारी संस्थाहरुमा पुँजी र बचत वृद्धि गत बर्षको तुलनामा कम भएको देखिएकाे छ । आर्थिक क्रियाकलापमा सुधार आउन अझै केहि समय लाग्ने देखिएकाले सहकारी संस्थाहरुको बचत र पुँजी तत्काल नबढ्ने कतिपयको विश्लेषण रहेको छ ।
