विगत एक वर्षदेखि सदस्यको बचत फिर्ता गर्न नसकेको देउराली बहुउद्देश्यीय सहकारीको फाइल अन्ततः केन्द्रीय अनुसन्धान ब्युरो (सीआईबी) मा पुगेको छ ।
सदस्यको बचत फिर्ता दिन भाखा सार्दै त कहिले जग्गा दिने प्रलोभन देखाउँदै आएको देउराली सहकारीबारे अनुसन्धान गर्न सहकारी विभागले लेखि पठाएको हो ।
बचतकर्तालाई अधिक ब्याजको प्रलोभन दिएर पैसा संकलन गरेको सहकारीले गत वर्ष असार १ गते सूचना टाँसेर कारोबार बन्द गरेको थियो । सहकारीले कारोबार बन्द गरेपछि बचतकर्ताले असार २ गते महानगरीय प्रहरी परिसर ललितपुरमा उजुरी दिए । त्यसपछि सहकारीलाई कर्जा सूचना केन्द्रले कालो सूचीमा राखेको छ ।
सहकारीका अध्यक्ष रविन्द्र चौलागाईंले बचतकर्ताको रकम दुई भागमा विभाजन गरेर दिने प्रतिबद्धता जनाएपछि लगानीकर्ताले केही समय धैर्य गरेका थिए । संस्थाले पटकपटक सदस्यलाइ झुक्याउने र बचत फिर्ता नगर्ने प्रवृत्ति देखिएपछि सीआईबीमा अनुसन्धानका लागि पठाइएको छ।
