काठमाडौं महानगरपालिकाले आफनो कार्यक्षेत्र भित्र रहेका सहकारी संस्थालाई ३० दिनभित्र विवरण पेस गर्न निर्देशन दिएको छ । महानगरपालिकाको सहकारी विभागले सूचना जारी गर्दै कतिपय सहकारी संस्थाले लामो समयसम्म साधारण सभाको जानकारी, लेखापरीक्षण प्रतिवेदनलगायतका विवरण नबुझाएको भन्दै उक्त समय भित्र विवरण बुझाउन भनेको छ । चालु अर्थिक बर्ष २०७९।८० सकिनै लाग्दा समेत महानगर क्षेत्रका केही सहकारीले साधारणसभाको जनाकारी नगराएको र लेखापरीक्षण प्रतिवेदन पनि पेश नगरेको विभागले जनाएको छ ।
सूचना जारी भएको मितिले ३० दिनभित्र विवरण पेश नगरे महानगरको सहकारी ऐनअनुसार कारबाही गर्ने बताएको छ । ऐनको दफा २८ को उपदफा २ मा आर्थिक वर्ष सकिएको ६ महिनाभित्र साधारणसभा बोलाउनुपर्ने, दफा ५४ को उपदफा १ मा तीन महिनाभित्र लेखापरीक्षण गराउनुपर्ने, दफा ५२ मा उक्त विवरण बुझाउनु पर्ने व्यवस्था छ । दफा ६६ मा सहकारीको विघटन वा दर्ता खारेजीसम्मको व्यवसथा छ । मेयर बालेन शाहले सहकारीले कानुनले निर्दिषट गरेका आफ्ना दायित्व र जिम्मेवारी पूरा गर्नुपर्न बताएका छन् ।
नियमित साधारण सभा नगर्ने सहकारीहरुको बारेमा विभागमा जानकारी गराउन, सञ्चालक समितिका पदाधिकारीहरुको आनीबानी र इमान्दारिताका बारेमा नियमित जानकारी लिन र बढी ब्याजको लोभमा लामो अवधिको अत्यधिक बचत नगर्न उनले आग्रह गरेका छन् । त्यसैगरी सहकारी संस्थाका बारेमा अतिरञ्जित हल्लाका पछाडि मात्र नलागी यथार्थ अवस्था बारे जानकारी लिन, कार्यक्षेत्रभन्दा बाहिर गएर कार्य गर्ने संस्थासँग कारोवार नगर्न र सञ्चालक समितिका पदाधिकारीहरुको पहिचान गरेर मात्र संस्थासँग कारोवार गर्न सदस्यलाइ उनको आग्रह छ ।
