नेपाल राष्ट्र बैंकले बैक तथा वित्तीय संस्थाहरूको मुद्दती निक्षेपमा करिब डेढ अर्ब रुपियाँ लगानी गर्ने भएको छ । राष्ट्र बैङ्कले आफ्नो उपदान तथा पेन्सन कोषमा रहेको सो रकम ‘क’, ‘ख’ वर्गका बैंक र ‘ग’ वर्गका फाइनान्स कम्पनीको मुद्दती निक्षेपमा लगानी गर्ने भएकाे हाे । 

राष्ट्र बैङ्कले वाणिज्य बैंकमा एक अर्ब १७ करोड ६० लाख रुपियाँ, विकास बैंकहरूमा २२ करोड पाँच लाख रुपियाँ र फाइनान्स कम्पनीहरूमा सात करोड ३५ लाख रुपियाँ गरी कुल एक अर्ब ४७ करोड रुपियाँ मुद्दती निक्षेपमा राख्न लागेको हो ।

उक्त निक्षेप राष्ट्र बैंकले २०८० असार १ देखि २०८१ असार २ गतेसम्म ३६६ दिन अवधिको लागि राख्न लागेको हो । निक्षेप लिन चाहने बैंक तथा वित्तीय संस्थाहरूले जेठ २५ गते बिहीबारसम्ममा ब्याजदर प्रस्ताव पेस गरिसक्नुपर्नेछ ।

राष्ट्र बैंकको निक्षेप लिनका लागि बैंक तथा वित्तीय संस्था सञ्चालनमा आएको कम्तीमा दुई वर्ष पूरा गरेको हुनुपर्ने छ भने राष्ट्र बैंकले तोकेको न्यूनतम पुँजी कोष कायम हुनुपर्ने छ ।

त्यसै गरी निक्षेप लिनका लागि निष्क्रिय  कर्जा कुल कर्जा सापटीको पाँच प्रतिशतभन्दा कम, खुद तरल सम्पत्ति स्वदेशी निक्षेपको कम्तीमा २० प्रतिशत वा सोभन्दा बढी हुनुपर्ने छ । त्यसैगरी कर्जा र स्वदेशी निक्षेप र प्राथमिक पुँजी अनुपात बैंकले समय समयमा निर्धारण गरेको सीमाभित्र रहेको हुनुपर्ने, शीघ्र सुधारात्मक कारबाहीमा परेको भए फुकुवा भएको कम्तीमा छ महिना पूरा भएको हुनुपर्ने लगायत शर्त रहेका छन् ।