कुम्भेश्वर महिला बचत तथा ऋण सहकारी संस्थाले ११औं स्थापना दिवस रक्तदान कार्यक्रम आयोजना गरी मनाएको छ ।
कोभिड १९ महामारीका बीचमा पनि संस्थाले मानव जीवनका लागि अत्यावश्यक तत्वको रुपमा रहेको रगतको मागलाई केहि मात्रमा भएपनि परिपूर्ति गर्ने उद्देश्यले रक्तदान कार्यक्रम गरेको जनाएको छ ।
कोभिडका कारण उल्लेख्य मात्रमा रक्तदाताहरु सहभागी हुन नसकेको संस्थाकी प्रबन्ध सञ्चालक शान्ता खड्गीले बताइन् । रक्तदान गर्न ३० जनाले सहभागिता जनाएको भएपनि कतिपयले कोभिडको भर्खरै खोप लगाएको र कतिपय रुघाखोकीको औषधी सेवन गरिरहेकाले १५ जनाले मात्र रक्तदान गर्न सकेको उनले जानकारी दिइन् । विगतका वर्षहरुमा संस्थाले रक्तदानसँगै महिलाजन्य रोगहरुको स्वास्थ्यशिविर गर्दै आएको भएपनि यो वर्ष भने गर्न नसकेको उनले जनाइन् ।
संस्थाले गत असार मसान्तसम्म ६७० शेयरसदस्य, ८५ लाख शेयरपुँजी र १२ करोड बचत संकलन गरी १८ करोडको कुल कारोबार गर्न सफल भएको छ । कोभिड महामारीकाबीचमा संस्थाले निम्न आय भएका ५० परिवारलाई खाद्यान्न सहयोग गरेको थियो भने वडा कार्यालयसँगको सहकार्यमा कौशी खेती तथा मास्क र स्यानिटाइजर बनाउने तालिम दिएको थियो । अधिकांश सदस्यहरुको मासु, तरकारी, फलफुल, खाद्यान्न र ह्याण्डिक्राफ्टको ब्यापार व्यवसाय रहेको र महामारीका कारण नियमित व्यापारव्यवसाय गर्न नसकेका कारण संस्थाको ब्याज आम्दानीमा प्रभाव परेको उनले जानकारी दिइन् ।
मासिक १०० रुपैया बचत गर्ने समुहबाट सहकारीमा रुपान्तरण भएको संस्थाले यस अवधिमा उल्लेख्य प्रगति गर्न सकेको छ । सदस्यहरुको आर्थिक सामाजिक उत्थानका लागि समुदायमा आधारित भएर काम गर्दै आएको उक्त संस्थाले सदस्यहरुको स्तरोन्नतिका लागि काम गर्दै आएको छ । गरिबी निवारण कोषसँग सहकार्य गरेर संस्थाले बेरोजगार र न्यून आय भएका सदस्यहरुको आयस्तर वृद्धि गर्न लघुवित्त र स्वरोजगार कार्यक्रम सञ्चालन गर्ने खड्गीले बताइन् ।
अनौपचारिक शिक्षा कार्यक्रम सञ्चालन गरी महिला सदस्यहरुलाई साक्षर बनाउनुकासाथै विद्युतीय सञ्चारका साधनहरु प्रयोग गर्न सक्ने बनाउने काममा पनि संस्थाको भूमिका रहेको छ ।
