जनसचेतन बचत तथा ऋण सहकारी संस्थाले संस्थाबारेमा भ्रमपूर्ण समाचार प्रकाशित भएको भन्दै त्यसको खण्डन गरेको छ । संस्थाले विज्ञप्ति जारी गर्दै एकपक्षीय ढंगले समाचार सम्प्रेषण भएको भन्दै त्यसको खण्डन गरेको हो ।
राष्ट्रिय तथा अन्तर्राष्ट्रिय स्तरमा संस्थाले छुट्टै छवि निर्माण गर्न सकेको भन्दै गलत समाचार र सामाजिक सञ्जालमा आएका तथ्यहीन सामग्रीका पछि नलाग्न सदस्यहरूलाइ अपील गरेको छ ।
संस्थाले विज्ञप्तिमार्फत संस्थाभित्र चेन अफ कमाण्ड कायम गर्न संस्थामा कार्यरत एक कर्मचारीलाइ बर्खास्त गरेको विषयलाइ केहि सञ्चारमाध्यमले अतिरञ्जित रूपमा प्रस्तुत गर्न खोजिएको जनाएको छ ।
संस्थाका सचिव कमल दाहालद्वारा प्रेषित विज्ञप्तिमा भनिएको छ, ‘वित्तीय क्षेत्रमा अनुशासित र पारदर्शी ढंगले काम गर्दै शेयर सदस्यहरुको मन जित्दै आएको जनसचेतन बचत तथा ऋण सहकारी संस्था जनजनको मनमा स्थापित सहकारी संस्था हो । लामो सहकारी यात्राको कालखण्डमा अनेक आरोह अवरोह पार गर्दै वित्तीय क्षेत्रमा सतीसालको रुपमा कार्यरत यो संस्थाले राष्ट्रिय, अन्तराष्ट्रिय पहिचान कायम गरेको छ। सामाजिक पक्ष विपक्ष र राजनीतिक आग्रह पूर्वाग्रह भन्दा टाढा रहेर शेयर सदस्यहरुको हितका लागि गतिविधि गर्नु नै जनसचेतनको पहिचान हो ।’
संस्थाका नीति नियम पालना गर्ने गराउने र संस्थाभित्र सुशासन कायम गर्ने सिलसिलामा एउटा जीवन्त संस्थाभित्र अनेकौँ प्रिय अप्रिय निर्णयहरु गर्नुपर्ने अवस्था सिर्जना भएकाले उक्त कदम चालिएको संस्थाको ठहर छ।
