नेपाल राष्ट्र बैंकले एकजना व्यक्तिलाइ एउटा लघुवित्त संस्थाले मात्रै कर्जा लगानी गर्न पाउने व्यवस्था गरेको छ । नेपाल राष्ट्र बैंकद्वारा ‘घ’ वर्गका वित्तीय संस्थाहरूका लागि बुधबार जारी एकिकृत निर्देशन अनुसार क, ख र ग वर्गका वित्तीय संस्थाबाट ऋण लिएका व्यक्तिले समेत कुनै पनि लघुवित्त संस्थाबाट ऋण लिन पाउने छैनन् । त्यसैगरी एक व्यक्तिले सामुहिक जमानी वा धितो जमानी मध्ये एकैपटक एउटा मात्रै ऋण मात्र पाउने व्यवस्था गरिएको छ । लघुवित्तबाट पाइने ऋणको अधिकतम सीमा १५ लाख रहेकोमा घटाएर ७ लाखमा ल्याइएको छ ।
एकिकृत निर्देशनमा भनिएको छ, ‘‘ विपन्न तथा न्यून आय भएका समूहमा आवद्ध भएका वा नभएका व्यक्तिहरुलाई स्वीकारयोग्य धितो लिई कृषि, लघु उद्यम वा व्यवसाय सञ्चालन गर्न प्रति व्यक्ति बढीमा रु. ७ लाख रुपैयाँसम्म लघुकर्जा उपलब्ध गराउन सकिनेछ । समूहमा आवद्ध भएको सदस्यलाई एकै अवधिमा समूह कर्जा वा धितो कर्जामध्ये कुनै एक कर्जा मात्र प्रवाह गर्न
सकिनेछ । ’’
तर पहिले नै ऋण लिइसकेका ऋणीलाई नियमित तालिका अनुसार ऋण तिर्न उक्त व्यवस्थाले बाधा नपर्ने व्यवस्था गरिएकाे छ ।
त्यसैगरी राष्ट्र बैंकले तोकेको एकल ग्राहक सीमा नाघ्नेगरी कर्जा लगानी गरेको लघुवित्तले शतप्रतिशत कर्जा नोक्सानी व्यवस्था गर्नुपर्ने व्यवस्था राष्ट्र बैंकले गरेको छ । लाभांश वितरण गर्दा १५ प्रतिशत माथि प्रस्ताव गरिएमा जति बढी प्रस्ताव गरिएकाे हाे त्यतिनै प्रतिशत जगेडा काेषमा समेत राख्नुपर्ने व्यवस्थामा भनिएकाे छ ।
नयाँ व्यवस्थाका अनुसार कुनै संस्थाबाट यसअघि ऋण लिएनलिएको सम्बन्धमा ऋणीको स्वघोषणा गराउनुका साथै कर्जा सूचना केन्द्रकाे रेकर्ड समेतका आधारमा यकिन गर्नुपर्ने उल्लेख छ ।
एकिकृत निर्देशिकाकाे पूर्ण पाठका लागि क्लिक गर्नुहाेस् ।
