प्रभु बैंकले सेञ्चुरी बैंकलाई प्राप्ति गरेर प्रभु बैंकको नामबाट एकीकृत कारोबार सुरू गरेको छ ।
प्रभु बैंकका पूर्व अध्यक्ष तथा प्रतिनिधि सभा सदस्य देवी प्रकाश भट्टचनले मर्जरपछि प्रभु बैंकले ठूलो ग्राहकलाई सहज रुपमा कर्जा प्रवाह गर्ने बताए । बैंकले ७ अर्बसम्म एकल कर्जा दिन सक्ने जनाए। सेन्चुरी बैंकका अध्यक्ष राजेश कुमार श्रेष्ठले सबैभन्दा कान्छो बैंकको रुपमा स्थापना भएको सेन्चुरी बैंक प्रभुसँगको मर्जरपछि टप फाइभमा पुगेको बताए ।
प्रभु बैंकका सीइओ अशोक शेरचनले मर्जरपछि सेयरधनीलाई अधिकतम प्रतिफल दिने प्रयास गर्ने बताए । ‘मेरो नेतृत्वमा बैंकलाई थप उचाइमा पुर्याउने छु, अधिकतम प्रतिफल सेयरधनिलाई दिने प्रयास हुनेछ,’ उनले भने ।
प्रभु र सेञ्चुरी १ः१ अनुपातमा मर्ज भएका हुन् । मर्जर पश्चात् बैंकको चुक्ता पूँजी २३ अर्ब ५२ करोड रुपैयाँ पुगेको छ । मर्जर पश्चात् बैंकको निक्षेप २ अर्ब ७७ करोड रुपैयाँ र कूल कर्जा २ खर्ब ३४ अर्ब ८१ करोड रुपैयाँ पुगेको छ । यस्तै, बैंकको शाखा सञ्जाल ३४१ वटा र २९६ वटा एटिएम पुगेका छन् । सेञ्चुरी बैंकमा १ हजार १४३ जना र प्रभु बैंकमा २ हजार ४१२ जना कर्मचारी कार्यरत रहेका छन् । मर्जर पश्चात् प्रभु बैंकको कर्मचारी संख्या ३ हजार ५५५ रहेका छन् ।
प्रभुु बैंकको नामबाट एकीकृत कारोबार भएको बैंकमा सात जना नयाँ सञ्चालक रहेका छन् । नयाँ सञ्चालक समितिमा लिला प्रकाश सिटौला, रमेश सिंह खड्का, मन बहादुर राई, शंकर प्रसाद कालिकोटा, प्रा। डा। गिता प्रधान, रामेश्वर सापकोटा र अभिषेक बज्राचार्य रहेका छन् ।
बैकका अनुसार यी नै ७ जना बाट एक जना अध्यक्षमा चुनिने छन् । संचालक समितिमा प्रभु बैंकबाट ४ र सेञ्चुरीबाट ३ जना रहेका छन् । मर्जपछि बैंकको सीईओमा अशोक शेरचन भएका छन् भने डेपुटी सीईओमा मनोज न्यौपाने रहेका छन् ।
