नवनियुक्त प्रधानमन्त्री पुष्पकमल दाहालले अर्थतन्त्रलाई प्राथमिकितामा राखेर सरकारका अघि बढ्ने बताएका छन् । मंगलबार बधाई एवं शुभकामना दिन प्रधानमन्त्रीको निजी निवास खुमलटार पुगेको नेपाल उद्योग परिसंघको टोलीसँग प्रचण्डले त्यसका लागि निजी क्षेत्रसँग सहकार्य गर्दै अगाडि बढ्ने विश्वास दिलाए ।
अध्यक्ष विष्णुकुमार अग्रवाल नेतृत्वको परिसंघ प्रतिनिधिमण्डलले प्रधानमन्त्री प्रचण्डलाई बधाई एवं शुभकामना दिँदै चुनौतीपूर्ण अवस्थामा रहेको मुलुकको अर्थतन्त्रको सुधार नयाँ सरकारको पहिलो प्राथमिकता हुनुपर्ने सुझाव दिएका थिए । त्यसक्रममा परिसंघले सङ्कटपूर्ण अवस्थामा रहेको मुलुकको अर्थतन्त्रलाई पुनः गति प्रदान गर्न तत्काल चालिनुपर्ने कदमसहतिको ‘रिबुटिङ नेप्लिज इकोनोमी’ अवधारणा प्रधानमन्त्रीलाई बुझाएको छ ।
अर्थतन्त्रलाई पुनः गति प्रदान गर्न वित्तीय क्षेत्र, औद्योगकि प्रवर्द्धन, पूर्वाधार, पर्यटन, ऊर्जा र सूचना प्रविधि क्षेत्रलाई प्राथमिकतामा राख्दै तत्काल गर्न सकिने उपायसमेत अवधारणामा परिसंघले बुझाएको छ । अवधारणापत्र बुझ्दै प्रम दाहालले अर्थतन्त्र सुधारका लागि निजी क्षेत्रबाट यस्तै खालको सुझाव खोजेको बताएका थिए ।
