चन्द्रागिरी नगरपालिकाको मातातीर्थमा अवस्थित खुसी खुसी बचत तथा ऋण सहकारी संस्था लिमिटेडको १४ औ बार्षिक साधारण सभा सम्पन्न गरेको छ । 

प्रदेश सभाकी निवर्तमान सांसद रमा आले मगरको प्रमुख आतिथ्य एवं संस्थाका अध्यक्ष बटुकृष्ण थापाको सभाध्यक्षतामा सभा सम्पन्न भएको हो । सभाले आर्थिक वर्ष २०७८।०७९ को वार्षिक प्रतिवेदन, आर्थिक प्रतिवेदन तथा चालु आ.व.को नीति कार्यक्रम तथा बजेट पारित गरेको जनाएको छ । समुदायमा आधारित रहेर सञ्चालन हुँदै आएको उक्त संस्थाले वित्तीय कारोबारलाई पारदर्शी एवं प्रविधिमैत्री बनाएको छ । 

सभामा जेष्ठ सदस्यलाई सम्मान गरिएको थियो भने ५ जनालाई असल सदस्य सम्मान समेत प्रदान गरिएको थियो । सो अवसरमा स्टार हस्पिटलको बिशेषज्ञ टोलीद्वारा सदस्यहरूको निःशुल्क स्वास्थ्य परीक्षण समेत गरिएको थियो । संस्थाले गत वर्ष देखि उक्त अस्पतालसँग सहकार्य गरी सदस्यहरुको स्वास्थ्योपचारमा विशेष छुटको व्यवस्था मिलाएको छ ।