श्री महिला तरकारी व्यवसायी बचत तथा ऋण सहकारी संस्थाको १४औं साधारण सभा सम्पन्न भएको छ ।
संस्थाकी अध्यक्ष गोमा रिजालको सभापतित्वमा सभा सम्पन्न भएको हो । संस्थाले सदस्यहरूलाइ प्रविधियुक्त सेवा दिने उदेश्यका साथ यस आ.व. बाट मोबाइल बैंकिङ सेवा सुरू गरेको अध्यक्ष रिजालले बताइन् । सहकारीको मुल्यमान्यता अनुरूप विभिन्न रणनीतिक योजना अवलम्बन गरी सदस्यहरूलाइ दिइने सेवामा विस्तार गर्दै लैजाने उनले सो अवसरमा बताइन् । संस्थाकी सचिव माया कोइरालाले आ.व. ०७८।७९ को वार्षिक प्रतिवेदन सभामा प्रस्तुत गरेकी थिइन् । संस्थाले यस आ. व. मा सदस्य शिक्षा, तालिम, सञ्चालक तथा कर्मचारीको क्षमता अभिवृद्धि तालिम, सहकारी अवलोकन भ्रमण, शिक्षा तथा स्वास्थ्य शिविर, कृषि क्षेत्रमा प्राथमिकताका साथ लगानी अभिवृद्धी र निम्न आय भएका सदस्यहरूलाइ लुमन्ती संस्थासँगको सहकार्यमा घर निर्माण परियोजना निर्माण गरिने उनले बताइन् ।
संस्थाकी कोषाध्यक्ष मेनुका नेपालले आर्थिक प्रतिवेदन प्रस्तुत गर्दै संस्थाले गत असार मसान्तसम्म १२२५ सदस्यबाट २ करोड ४५ लाख ५४ हजार शेयर पुँजी संकलन गरेका बताइन् । त्यसैगरी बचत संकलन १५ करोड ७७ लाख र ऋण लगानी १८ करोड ६४ लाख गरी त्यस अवधिमा २२ करोड ३२ लाख कुल कारोबार गर्न सकेको उनले जनाइन् । संस्थाले त्यस अवधिमा ६४ लाख ९१ हजार खुद नाफा गरेको छ ।
संस्थाले विभिन्न प्रकारका बचत योजना र ऋण लगानीबाट सदस्यहरूलाइ सेवा प्रदान गर्दै आएको छ ।
२०६५ सालमा महिलाहरूद्वारा स्थापित उक्त संस्थाले महिला सदस्यहरूको आर्थिक तथा सामाजिक उत्थानका लागि रचनात्मक भूमिका खेल्दै आएको छ ।
सभा राष्ट्रिय सहकारी महासंघकी बरिष्ठ उपाध्यक्ष ओमदेवी मल्लको प्रमुख आतिथ्यतामा सम्पन्न भएको हो । सभामा कास्कुनका अध्यक्ष दिपक पनेरू लगायत विभिन्न संघसंस्थाका प्रतिनिधिको आतिथ्यता रहको थियो ।
