ललितपुर जिल्ला बचत तथा ऋण सहकारी संघको २९ औं स्थापना दिवसको अवसरमा सुझाव संकलन, धन्यवाद ज्ञापन, तथा विजया दशमी २०७९ को शुभकामना आदान–प्रदान कार्यक्रम गरिएको हो ।
कार्यक्रम संघका अध्यक्ष रामहरि बजगाईंको सभापतित्व एवं राष्ट्रिय सहकारी महासंघकी वरिष्ठ उपाध्यक्ष ओमदेवी मल्लको प्रमुख आतिथ्यतामा सम्पन्न भएको हो । कार्यक्रममा संघका पूर्वअध्यक्ष, संचालक, सल्लाहकार, विभिन्न उपसमिति सदस्य तथा सदस्य सहकारी संस्थाका प्रतिनिधिहरुबाट सुझाव संकलन गरिएको थियो ।
संघको निर्वाचन सहितको २८औं वार्षिक साधारण सभामा निस्पक्ष, र्निविवाद ढंगले निर्वाचन कार्यलाई सफलतापूर्वक सम्पन्न गराउने निर्वाचन समितिलाइ अध्यक्ष बजगाइँले धन्यवाद ज्ञापन गरेका थिए ।
कार्यक्रममा संघले तय गरेका अधिकांश लक्ष्यहरु पुरा भएको र स्थापना दिवसको सुखद उपलक्ष्यमा वित्तीय सुशासन सहित गुणस्तरीयता कायम गराउन संघमा आवद्ध सम्पूर्ण सहकारी संस्थाहरुलाई आग्रह गर्दै संस्थाहरुको विकास, सुशासन र सम्वृद्धिको लागि संघको तर्फबाट अध्यक्ष बजगाइँले प्रतिवद्धता व्यक्त गरे ।
संघले ललितपुर जिल्लाका अधिकांश बचतऋण संस्थाहरूलाइ सदस्य बनाउन सफल भएको छ भने यस अवधिसम्म आइपुग्दा संघ एउटा सबल र सक्षम संघको रूपमा स्थापित भएको छ ।
सोही अवसरमा सहकारीकर्मी प्रशिक्षक कुमार खत्रीले तरलता व्यवस्थापन सम्बन्धि प्रस्तुतिकरण गरेका थिए । कार्यक्रमलाई बचत संघका सचिव श्यामकृष्ण महर्जनले सञ्चालन गरेका थिए ।
