बनेपाको तीनदोबाटोमा मुख्य कार्यालय रहेको आभाष बचत तथा ऋण सहकारी संस्थाले १३औं बार्षिक साधारण सभा सम्पन्न गरेको छ ।
संस्थाका अध्यक्ष दिनेशराज कायष्ठको सभापतित्व एवं बनेपा नगरपालिकाका प्रमुख शान्तिरत्न शाक्यको प्रमुख आतिथ्यता सभा सम्पन्न भएको हो ।
सभामा अध्यक्ष कायस्ठले आफ्नो प्रतिवेदन प्रस्तुत गर्दै संस्थाले स्वास्थ्य र समुन्नत समाज अन्तर्गत आभाष सदस्य सुरक्षा कार्यक्रम र लैंगिक समानताका लागि छोरी बचाउ अभियान शुरु गरिएको बताए ।
संस्थाले नव वर्ष र संस्थाको वार्षिक उत्सवको दिन शिर मेमोरियल अस्पताल बनेपामा जन्म लिने पहिलो छोरीलाई आर्थिक सहयोग गर्दै आएको र सदस्य सुरक्षा कार्यक्रम अन्तर्गत ४३ जना सदस्यलाई विभिन्न रोगको उपचारका लागि ४ लाख ७५ हजार रुपैया आर्थिक सहायता प्रदान गरिएको जनाए । संस्थाले महिला सशक्तिकरणका लागि पनि काम गर्दै आएको र कार्यक्षेत्रभित्र ४१ वटा महिला समुह गठन गरी उनीहरुलाई सीपमुलक तालिम तथा स्वास्थ्यशिविर आयोजना गरिएको उनले बताए ।
सहकारीहरुबीच अस्वस्थ प्रतिस्पर्धा र सहकारी शिक्षाको अभावले गर्दा संस्थाकाको सामथ्र्य नभएपनि नियमविपरीत बढि ब्याजमा बचत संकलन गर्ने र अस्वाभाविक व्याजमा ऋण लगानी गर्ने गर्दा वित्तीय जोखिम बढाएको कायष्ठले उल्लेख गरे ।
सभामा संस्थाका सचिव प्रकाश कायस्थले आर्थिक वर्ष २०७८।७९को वार्षिक प्रतिवेदन सभामा प्रस्तुत गरेका थिए । संस्थाले शुरु गरेको सदस्य सुरक्षा कोषमा असारमसान्तसम्म २८४३ जना सदस्यले सहभागिता जनाएको उनले बताए । गत आवमा उक्त कार्यक्रममा आवद्ध सदस्यको कालगतिले मृत्यु भएका ३ जनाको परिवारलाई प्रति सदस्य १० हजार, क्यान्सर पिडित ३ जना सदस्यलाई प्रति सदस्य २५ हजार तथा विभिन्न रोग लागेका ३७ जना सदस्यलाई उपचार गर्न प्रति सदस्य १० हजार सहयोग गरेको उनले जानकारी दिए ।
सभामा उनले संस्थाको छोरी अभियान अन्तर्गत यो वर्ष २ जना सदस्यलाई २० हजार सहयोग गरेको पनि बताए । उनले सदस्यहरुलाई सहकारी शिक्षा तालिमलगायतको कार्य गर्दै आएको जानकारी गराए ।
त्यसैगरी सभामा संस्थाका कोषाध्यक्ष धर्मभक्त प्रधानले आर्थिक वर्ष २०७८।०७९ को आर्थिक प्रतिवेदन तथा २०७९।८० को कार्यक्रम तथा बजेट प्रस्तुत गरेका थिए ।
गत आ.व.मा संस्थाले ३ करोड ७० लाख ९८ हजार शेयर पूँजी, ५८ करोड ५ लाख रुपैयाँ बचत संकलन गरी ५६ करोड ६९ लाख रुपैयाँ ऋण लगानी गरी ७७ लाख ८९ हजार रुपैयाँ खुद मुनाफा गरेको सभालाई प्रधानले जानकारी दिए । उनले उक्त आर्थिक वर्षमा ७१ करोड ६४ लाख १२ हजार रुपैयाँको कुल कारोबार गरेको जनाए ।
संस्थाको जगेडा कोषमा १ करोड ९१ लाख रुपैयाँ रहेको जनाइएको छ । ५ हजार ८ सय ३२ सदस्य रहेको संस्थाको पनौति र भकुण्डेमा सेवाकेन्द्र रहेका छन्।
संस्थाले एबिबिएस, तथा एसएमएस अलर्ट र रेमिटेन्स सेवा प्रदान गर्दै आएको छ । साधारण सभाले सदस्यका छोरा छोरीमध्ये एसइईमा उत्कृष्ट अंक ल्याउने छात्र छात्रा, जेष्ठ सदस्य, उत्कृष्ट कारोबार गर्ने सदस्य र कर्मचारीलाई समेत सम्मान गरेको छ ।
संस्थाले यस आ.व. मा थप १० वटा महिला समुह गठन गर्ने सुत्केरी भेटघाट कार्यक्रमलाई सदस्य सुरक्षा कार्यक्रममा समावेश गर्न अध्ययन गर्ने । सुरक्षा कार्यक्रमको सुविधा वृद्धि गर्न अध्ययन गर्ने, संस्थामा आवद्ध नयाँ सदस्यहरुलाई सदस्य शिक्षा दिने, कृषि, पशुपालन, कुकिङ लगायत विभिन्न व्यवसायिक तालिम प्रदान गर्ने योजना बनाएको छ ।
