सिभिल सहकारी संस्थाका पूर्वअध्यक्ष इच्छाराज तामाङको सपरिवार सम्पत्ति शुद्धिकरणको राडारमा परेका छन् । करिब ५ अर्ब भन्दा बढि रकम ठगी गरी सम्पत्ति शुद्धिकरण गरेको आशंकामा तामाङ परिवारको अनुसन्धान थालेको सम्पत्ति शुद्धिकरण विभागले निज तामाङ, उनकी पत्नी र दुई छोरीको समेत त्यसमा संलग्नता देखिएको जनाएको छ ।
सिभिल सहकारी संस्था ठगी गरी सम्पत्ति शुद्धिकरणमार्फत अकुत सम्पत्ति आर्जन गरेको ठहर गर्दै विभागले अनुसन्धान अघि बढाएको थियो ।
विभागका अनुसार तामाङले सिभिल सहकारी ठगी गरी ३ अर्ब ३१ करोड रुपैयाँ सम्पत्ति शुद्धीकरण गरेका छन् । तामाङकी श्रीमती सिर्जना शाक्यले १ अर्ब ३ करोड रुपैयाँ सम्पत्ति शुद्धीकरण गरेको विभागको अनुसन्धानमा फेला परेको छ ।
त्यस्तै छोरी प्रतिक्षाले ६ करोड माथि र प्रतिशाले करिब २ करोड रुपैयाँ सम्पत्ति शुद्धीकरण गरेको भेटिएको छ भने सहकारीका तत्कालीन अध्यक्ष केशवलाल श्रेष्ठले २६ करोड रुपैयाँ सम्पत्ति शुद्धीकरण गरेको भेटिएको छ ।
तामाङ र उनको परिवारले सिभिल सहकारी संस्थामा बचतकर्ताले राखेको रकम आफूखुसी चलाएर सम्पत्ति शुद्धीकरणको प्रयास गरेकाे देखिन्छ ।
