राष्ट्रिय सहकारी महासंघले करिब एक बर्षदेखि देखिएको तरलता संकटको असर सहकारी क्षेत्रमा समेत देखिन थालेको भन्दै आफ्नो वित्तीय जोखिम विश्लेषण गरी सामान्य अवस्थामा भन्दा बढि तरलता कायम राख्न अपिल गरेको छ ।
महासंघले ९ बुद्धे अपिल जारी गर्दै विश्व कोभिड–१९ को महामारी, रुस–युक्रेन युद्धसँगै वस्तु तथा सेवाहरुको मुल्यबृद्धि र मुद्रास्फीतिको असर पर्न गई नेपालका बैंक तथा वित्तीय संस्थाहरूमा समेत लगानीयोग्य रकमको अभाव भएको अबस्थामा वितीय जोखिम विश्लेषण गरेर मात्र लगानी गर्न सहकारी संघ संस्थालाई अनुरोध गरेको हो । जथाभावी लगानी गर्दा अहिले कतिपय सहकारी संस्थामा तरलताको चाप पर्न गई सदस्यहरूलाई बचत फिर्ता गर्न कठिनाई भईरहेको छ ।
त्यसैगरी महासंघले सदस्य एवंम् सरोकारवाला निकायहरुसँग संस्थाको वर्तमान अवस्थाको बारेमा निरन्तर समन्वय र सम्वाद जारी राख्न ,सहकारीका मूल्य, मान्यता र सिद्धान्त बमोजिम आन्तरिक नियन्त्रण प्रणालीलाई चुस्त राख्दै संस्थागत सुशासन कायम गर्न रजोखिम विश्लेषण कार्यविधि तयार गरी जोखिम न्यूनीकरणका लागि योजनावद्ध तथा प्रभावकारी रूपमा असुलीमा केन्द्रित रहन आग्रह गरेको छ ।
त्यसैगरी परिस्थिति सहज नहुदासम्म घरजग्गा लगायत अनुत्पादक क्षेत्र एवं ठूला लगानी नगर्न सहकारी संघ संस्थाहरुलाई अपिल गरेको छ । महासंघ, संघ एवं सहकारी बैंकले सञ्चालन गरेका स्तरीकरण कार्यक्रम एवं तालिमहरूमा सहभागी भई संस्थागत क्षमता मजवुद बनाउन र सहकारी अभियानको ऐक्यवद्धतालाई कायम राख्न माथिल्लो संघहरूसंग नियमित सम्पर्कमा रहदै यथासम्भव अभियानभित्रै कारोबार गर्न अपिल गरेको छ । राष्ट्रिय सहकारी बैंक, केन्द्रिय, प्रदेश तथा जिल्लास्तरीय संघहरूले आफ्ना सदस्य संस्थाहरूसंग नियमित सम्पर्क र समन्वय गरी संस्था संचालनमा आवश्यक सहजीकरण गर्न र सदस्यहरूले समेत अस्वाभाविक ब्याजको लोभमा नपरी संस्थागत क्षमता भएका र सुशासनमा सञ्चालित संस्थाहरूसंग मात्र कारोबार गर्न महासंघको अपिल छ ।
