पोखरा रोयल बचत तथा ऋण सहकारी संस्थाले नयाँ ब्याजदर सार्वजनिक गरेको छ । नयाँ ब्याजदर अनुसार अब सदस्यहरुले ८.८८ प्रतिशत ब्याजदरमा ऋण पाउने भएका छन् । संस्थाले नयाँ आर्थिक वर्षको शुरुवातसँगै नयाँ ब्याजदर सार्वजनिक गरेको हो ।
संस्थाले ८.८८ प्रतिशत व्याजदरमा ‘रोयल कियर लोन’ र ९.९९ प्रतिशत व्याजदरमा ‘व्यवसाय निरन्तरता ऋण’ दिने निर्णय जनाएको छ । संस्थाका अनुसार ‘रोयल कियर लोन’ १० लाख रुपैयाँसम्म र ‘व्यवसाय निरन्तरता ऋण’ एक करोड १० लाख रुपैयाँसम्म दिइने छ । उक्त व्याजदर १ वर्षसम्म परिवर्तन नहुने संस्थाले उल्लेख गरेको छ ।
कोरोना महामारीका कारण सदस्यहरुको व्यवसायमा प्रभाव परेको र त्यसलाई पुनरुद्धार गर्नका लागि सहुलियत स्किममा ऋण लगानी गर्न लागिएको मुख्य प्रबन्धक मिलन ढकालले बताए । संस्थाले उक्त शीर्षक अन्तर्गत ऋण प्रवाह गर्न ३० करोडको वित्तीय स्रोतको व्यवस्थापन गरेको उनले जानकारी दिए ।
पोखराको बुद्धचोकमा प्रधान कार्यालय रहेको यस संस्थाले थप तीन वटा सेवाकेन्द्र बाट सदस्यलाई वित्तीय सेवा प्रदान गर्दै आएको छ । संस्थामा हाल ७ हजार ३४६ सदस्य, २० करोड शेयर पूँजी, १३ करोड जगेडा कोष रहेको छ । गण्डकी प्रदेशकै उत्कृष्ट संस्थाको रुपमा उक्त संस्थालाई राष्ट्रिय सहकारी महासंघले पुरस्कृत समेत गरिसकेको छ ।
