आन्तरिक राजश्व विभागले सहकारी संघसंस्थाहरुले कोपोमिसमा आवद्ध भएपछि मात्रै करचुक्ताको प्रमाणपत्र दिन परिपत्र गरेको छ । विभागले आफु मातहतका कार्यालयहरुलाई परिपत्र जारी गर्दै सबै सहकारी संघसंस्थाले कोपोमिस प्रणालीमा विवरण प्रविष्टि गरेको प्रमाण पेश गरेपछि मात्रै कर चुक्ताको प्रमाणपत्र जारी गर्न निर्देशन दिइएको हो ।
विभागले ठूला करदाता कार्यालय,मध्यमस्तरीय करदाता कार्यालय, आन्तरिक राजश्व कार्यालय र करदाता सेवा कार्यालयहरुलाई उक्त परिपत्र गरेको हो । सहकारी विभागले गत जेठ ९ गते राजश्व विभागलाई आगामी आ.ब. २०७९।८० देखि कोपोमिस प्रणालीमा आवद्ध भएको प्रमाण पेश गरेपछि मात्रै करचुक्ताको प्रमाणपत्र दिने व्यवस्था मिलाइदिन अनुरोध गरेको थियो ।
सहकारी संघ संस्थाले कोपोमिसमा आबद्ध हुन अटेर गरेपछि सहकारी विभागले राजश्व कार्यालयलाई गुहारेको हो । विभागको तथ्याकं अनुसार ११ हजार ४ सय सहकारीलाई कोपोमिसको युजरनेम तथा पासवर्ड वितरण गरेपनि ७ हजार सहकारीले मात्र लगइन गरेका छन् । समष्टिगत विवरण बुझाउने सहकारीको संख्या ३ हजार हारहारीमा रहेको छ ।
