दर्शन बचत तथा ऋण सहकारी संस्थाले चन्द्रागिरि नगरपालिकामा सेवा केन्द्र विस्तार गरेको छ । संस्थाले चन्द्रागिरि नगरपालिकाको वडा न. ९ मच्छे गाउँमा सेवाकेन्द्र विस्तार गरेको हो । संस्थाका अध्यक्ष दिनेश दर्शनधारीको सभापतित्वमा भएको कार्यक्रममा राष्ट्रिय सहकारी बैंकका अध्यक्ष के बी उप्रेती र महानायक शिव सुन्दर श्रेष्ठले सयुक्त रुपमा सेवा केन्द्रको उद्घाटन गरेका हुन् ।
त्यसैगरि संस्थाले चन्द्रागिरि सेवा केन्द्रमा एटिएम सेवा समेत सञ्चालनमा ल्याएको संस्थाका प्रमुख कार्यकारी अधिकृत सुवर्ण महर्जनले जानकारी दिए । चन्द्रागिरि सेवा केन्द्र तेस्रो सेवा केन्द्र भएको समेत उनले बताए । मच्छे गाउँ सेवा केन्द्रमा ५०० माथी सदस्य आवद्ध रहेका छन् । संस्थाले यस अघि खुशीबु नयाँबजार र घट्टेकुलोमा सेवा केन्द्र स्थापना गरि सदस्यहरुलाई वितीय सेवा दिदै आएको छ ।
संस्थाले कीर्तिपुरको पाँगा दोबाटो, नेपाल टेलिकमसँगै रहेको टिभिएस शोरुममा यस अघि नै एटिएम मेशिन सञ्चालनमा ल्याएको थियो । संस्थाले माच्छापुच्छ्रे बैंकको समन्वयमा एससीटी नेटवर्कसँग सहकार्य गरेर एटिएम सेवा सञ्चालनमा ल्याएको हो ।
सदस्यहरुलाई प्रविधिमैत्री सेवा दिने उद्देश्यले संस्थाले मोबाइल तथा एसएमएस बैंकिङ, क्युआर कोड सञ्चालनमा ल्याइसकेको छ भने बजार प्रतिनिधिले एपको प्रयोग गरी सदस्यहरुबाट बचत संकलन गर्दै आएका छन् । ८ हजार शेयर सदस्य रहेको संस्थाले किर्तिपुरमा आफ्नै सुविधासम्पन्न भवनबाट सदस्यहरुलाई सेवा दिँदै आए छ । संस्थाको कार्यक्षेत्र काठमाण्डौ महानगरपालिका, कीर्तिपुर र चन्द्रागिरि नगरपालिका रहेको छ ।
