जिल्ला सहकारी संघ काभ्रेले सहकारी सहकारी क्षेत्रमा देखिएका समस्या र समाधानका लागि पहल गर्ने भएको छ । संघले सबै नगर र गाउँपालिकामा रहेका सहकारी संस्थाहरुसँग सो विषयमा अन्तक्र्रिया गरी समाधानका लागि पहल गर्ने भएको हो ।
संघले जिल्लाभर क्षेत्रगत रुपमा सहकारीका समस्या र समाधान विषयक अन्तक्र्रिया कार्यक्रम चलाइरहेको छ । यस अघि संघले बेथान गाउँपालिकाको पनौति, पाँचखाल नगरपालिका, मण्डनदेउपुर, चौंरीदेउराली र भुम्लु गाउँपालिकाका लागि जिरो किलो अन्तक्र्रिया गरिसकेको छ ।
त्यसैगरी बनेपा र धुलिखेल नगरपालिकालाई समेटेर भोलि बनेपामा कार्यक्रम हुने संघका अध्यक्ष दिलिप शर्माले जानकारी दिए । कार्यक्रममा सहकारीका नीतिगत तथा कानुनी व्यवस्था र तरलताका विषयमा छलफल भइरहेको उनले जानकारी दिए । संघको तर्फबाट सीइओले प्रस्तुति गर्ने र संघसंस्थाबाट उठेका प्रश्नहरुको समाधानका लागि संघले प्रतिवद्धता जनाउने उनको भनाई छ ।
तरलताको समस्या रहिरहेकाले ठूलो परिमाणको ऋण लगानी नगर्न र घरघडेरी, प्लटिङ जस्ता अनुत्पादक क्षेत्रमा लगानी निरुत्साहित गर्न सुझाइएको उनले जनाए । अनुत्पादक क्षेत्रमा ऋण लगानी हुँदा समयमा साँवाँब्याज नउठ्ने र संस्थाहरुको तरलता व्यवस्थापन कठिन हुनेहुँदा हाललाई उत्पादनमूलक र ससानो ऋण मात्र प्रवाह गर्न प्रोत्साहित गरिएको छ ।
संघमा बचतऋण मात्रै नभई दुग्ध, कृषि, बहुउद्देश्यीय सबै प्रकृतिका सहकारी आवद्ध रहेका छन् । कृषि सहकारीले बीउबिजन र रासायनिक मल नपाएको, दुग्ध सहकारीले दुधको उचित मुल्य नपाएको जस्ता समस्या उठाएकाले सम्बन्धित विषयगत संघहरुमार्फत समस्या समाधानका लागि पनि संघले पहल गर्ने भएको छ । नीति बनाउने, कार्यान्वयनमा लैजाने र प्रविधि प्रयोग जस्ता विषयमा संघले नै पहल गर्ने भएको छ ।
जिल्लामा रहेका सबै सहकारीहरुको अभिभावक संघ भएकाले समस्याको पहिचान गरी समाधानका निम्ति पहल गर्नु आफ्नो दायित्व भएकाले क्षेत्रगत रुपमा आएका समस्यको समाधान लागि पर्ने शर्माको भनाई छ ।
संघमा हालसम्म ५४० सदस्य संस्था आवद्ध छन् । संघमा आवद्ध नभएका संस्थाहरु पनि अन्तक्र्रियामा सहभागि भई आफ्ना समस्या र सुझाव राख्न सक्ने उनले जनाए ।
