भक्तपुरको सूर्यविनायक नगरपालिका चित्रपुरमा रहेको जनता बचत तथा ऋण सहकारी संस्थाले बृहत् नारी भेला तथा खुला बनभोज कार्यक्रम सम्पन्न गरेको छ । संस्थाले ११२औ अन्तर्राष्ट्रिय नारी दिवसको अवसरमा बाेडेकाे कुमारी पार्कमा उक्त कार्यक्रम आयोजना गरेको हो ।
संस्थाका अध्यक्ष राजेश राजथलाको सभापतित्व एवं नारी बालबालिका तथा जेष्ठ नागरिक उप समिति संयोजक चन्द्रमाया श्रेष्ठको संयोजनमा भएको कार्यक्रममा ३२५ जनाको सहभागिता रहेको थियो ।
सो अवसरमा संस्थाले संस्थाले सञ्चालन गरेको महिला समुहका क्रियाकलापको बारेमा समीक्षा गर्नुका साथै एकआपसमा अनुभव साटासाट गरिएको थियो । हालसम्म संस्थाका ९३ वटा समुह रहेका छन् । एउटा समुहमा ५ जना महिला आवद्ध रहेका छन् । ती समुहहरुबाट मात्रै संस्थाले १ करोड बचत संकलन गरेको छ ।
समुहको अवधि ३ वर्षको हुने र ३ वर्षपछि समुहको समयावधि सकिने हुँदा त्यस अवधिमा जम्मा भएको बचत स्मार्ट गृहणी बचत खातामा जम्मा गरे आकर्षक ब्याज दिने संस्थाले जनाएको छ ।
उक्त समुहमा आवद्ध महिलाले मासिक ३ सयदेखि बचत गर्न सक्ने र ३ वर्ष पूरा भएपछि एकमुष्ट साँवाब्याज प्राप्त गर्दछन् । उक्त रकमलाई स्मार्ट गृहणी खातामा जम्मा गरे वार्षिक ११.७५ ब्याज दिइने संस्थाले जनाएको छ । न्यूनतम १० हजार रकमबाट उक्त खातामा जम्मा गर्न सकिनेछ ।
संस्थामा १७११ महिला सदस्य आवद्ध रहेका छन् । सदस्यहरुलाई संस्थाले सीपमूलक तालिम तथा प्रशिक्षण सदस्यहरुलाई दिने जनाएको छ ।
